ދިވެހި ނޫސްވެރިންނަށް މަސްދަރު ހާމަކުރަން މަޖުބޫރުވާ ގޮތަށް އޮތް ހެއްކާ ބެހޭ ގާނޫނު އިސްލާހުކުރަން މަސައްކަތްކޮށް ދެއްވާނެ ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެއެވެ.
ހެއްކާ ބެހޭ ބިލާ ގުޅިގެން ހުރި ކަންބޮޑުވުންތައް، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ރައިސް ސޯލިހާ މިއަދު ހެނދުނު ހިއްސާ ކުރިއެވެ.
މި ބައްދަލުވުމުގައި އެމްޖޭއޭ އިން ފާހަގަކުރި ގޮތުގައި ގާނޫނުގައި މަސްދަރު ހާމަކުރުމާ ގުޅޭ ގޮތުން، ޤައުމީ ސަލާމަތާއި ޓެރަރިޒަމް މާނަކޮށްފައިވާ ގޮތްތަކާ މެދު ކަންބޮޑުވުން އެބަހުއްޓެވެ.
ރައީސް ސޯލިހު ވަނީ ހެއްކާ ބެހޭ ޤާނޫނުގައި މަސްދަރު ހާމަކުރަން ޖެހޭ ގޮތަށް މާއްދާއެއް ހިމެނި ސަބަބާއި އެކަމުގެ ބޭނުން ސާފުކޮށްދެއްވައިފައެވެ.
ރައީސް ވިދާޅުވީ، އެ މަނިކުފާނުގެ ސަރުކާރުން މީޑިއާގެ މިިނިވަންކަމަށާއި ނޫސްވެރިކަމުގެ މިނިވަންކަަމަށް ހުރަހެއް ކުރިމަތި ނުކުރުވާނެ ކަމަށާއި މި ސަރުކާރުގެ ފާއިތުވެ ދިޔަ އަހަރުތަކުގައިވެސް އަމަލުކޮށްފައި ވަނީ އެގޮތަށް ކަމަށެވެ.
އަދި ސަރުކާރުން މަސައްކަތްކުރަމުން ގެންދަނީ ޤައުމުގައި ހަމަޖެހުން ޤާއިމްކޮށް ހުރިހާ ފަރާތްތަކަކަށް ވެސް ރައްކާތެރިކަން ހޯދައިދެއްވުމަށްކަމުގައި ރައީސް ވިދާޅުވިއެވެ.
