ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އައިޝަތު އާޒިމާ ޝުކޫރުގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުމެއް މާދަމާ ބާއްވަން ކްރިމިނަލް ކޯޓުން ހަމަޖައްސައިފިއެވެ.
އާޒިމާގެ މައްޗަށް އުފުލާފައިވަނީ މަނީ ލޯންޑަރ ކުރުމަށް މަގުފަހިކޮށްދިނުމުގެ ދައުވާ އާއި ރަސްމީ އިދާރާއަކަށް ދޮގު މަޢުލޫމާތު ދިނުމުގެ ދަޢުވާއެވެ. މި ދައުވާތައް، އާޒިމާގެ މައްޗަށް އުފުލީ، އެމްއެމްޕީއާރްސީ މެދުވެރިކޮށް ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ ކަމަށް ބުނާ އެއް މިލިއަން ޑޮލަރު ކުރީގެ ރައީސް ޔާމީން ލޯންޑާ ކުރެއްވި ކަމަށް ތުހުމަތު ކުރި މައްސަލައާ ގުޅިގެންނެވެ.
އާޒިމާގެ ޝަރީއަތުގެ އަޑުއެހުން ބާއްވަން ހަމަޖައްސާފައިވަނީ މާދަމާ ހެނދުނު 9 ޖަހާއިރުއެވެ.
އާޒިމާގެ މައްޗަށް އުފުލާފައިވާ ދައުވާ މަދަނީ މިންގަނޑުން ކުރިއަށް ގެންދެވޭނެ ކަމަށް ކްރިމިނަލް ކޯޓުން ކަނޑައެޅުމުން އެ ނިންމުން އާޒިމާގެ ފަރާތުން ވަނީ ހައިކޯޓާއި ސުޕްރީމް ކޯޓުގައި އިސްތިއުނާފުކޮށްފައެވެ.
އެގޮތުން އެ ދެ ކޯޓުން ވެސް ނިންމީ އެ ދައުވާ ކުރިއަށް ގެންދެވޭނެ ކަމުގައެވެ.
