ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް ޣިޔާސުއްދީން ސްކޫލްގައި ބާއްވަން އުޅުނު ޖަލްސާއާ ގުޅިގެން އެސްއޯ ފުލުހުން އެތަނަށް ފޮނުވި ގޮތާ ގުޅޭ ތަހުގީގު ރިޕޯޓާއި ގުޅިގެން ބައެއް ފިޔަވަަޅުތައް އަޅަން ރައީސް ޑރ. މުހައްމަދު މުއިއްޒު ރޭ އަންގަވައިފިއެވެ.
ކުރީގެ ރައީސް ޔާމީން އަބްދުލްގައްޔޫމް އިސްވެ އުފައްދަވަން މަސައްކަތް ކުރެއްވި ޕީޕަލްސް ނެޝެނަލް ފްރޮންޓް (ޕީއެންއެފް) އުފައްދަން ޣިޔާސުންދީން ސްކޫލުގައި ބާއްވަން އުޅުނު ޖަލްސާ ހުއްޓުވަން އެސްއޯ ފުލުހުން ފޮނުވި މައްސަލަ ބަލަން ރައީސް މުއިއްޒު ވަނީ އަންގަވާފައެވެ.
އެ ފިޔަވަޅުތައް އެޅުމަށް އެމަނިކުފާނު ހޯމް ލޭންޑް ސެކިއުރިޓީ އެންޑް ޓެކްނޮލޮޖީ މެދުވެރިކޮށް ކޮމިޝަނަރު އޮފް ޕޮލިސް އަލީ ޝުޖާއުއަށް އަންގަވާފައިވާ ކަމަށް މިނިސްޓްރީ އިން ބުނެއެވެ.
އެގޮތުން އެސްއޯ ފުލުހުން އެންގޭޖްވާންޖެހޭ އޮޕަރޭޝަނަލް ހާލަތްތައް އަލުން ކަނޑައަޅާ އެ ހާލަތްތަކުގައި ވެސް ޑިޕްލޮއި ކުރުމުގެ ކުރީން ކޮމިޝަނަރުގެ ސީދާ ހުއްދައިގެ ދަށުން އެކަން ކުރުމާއި ފުލުހުންގެ އޮޕަރޭޝަނަލް ކޮމާންޑް އެންޑް ކޮންޓްރޯލް އަލުން ރީސްޓްރަކްޗާކޮށް މިހާރު ހުރި ގޮންޖެހުންތަކަށް ހައްލު ހޯދުމަށް ރައީސް އަންގަވާފައިވާ ކަމަަށް ހޯމް މިިނިސްޓްރީ އިން ނެރުނު ބަޔާނުގައިވެއެވެ.
އެ މިނިސްޓްރީގެ ބަޔާނުގައި ބުނިގޮތުގައި ގިޔާސުއްދީން ސުކޫލުގައި އެސްއޯ ފުލުހުން ޑިޕްލޮއި ކުރެވުނު ގޮތް ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑުން ތަހުގީގުކޮށް އެއްވެސް ފަރާތަކުން އިހްމާލުވެފައިވާނަމަ އެ ފަރާތަކަށް ގާނޫނީ ފިޔަވަޅު އެޅުމަށް ރައީސް މުޢިއްޒު އަންގަވާފައިވެއެވެ.
މީގެ އިތުރުން އޮޕަރޭޝަނަލް ހާލަތްތަކުގައި މީޑިއާތަކަށް މައުލޫމާތު ދިނުމުގައި އަމަލު ކުރަމުންދާ އުސޫލު މުރާޖައާކޮށް މިހާރަަށް ވުރެ ދެފުށް ފެންނަ އަދި ތަފްސީލީ ގޮތަކަށް ރައްޔިތުންނަށް މައުލޫމާތު ހާމަ ކުރެވޭނެ ގޮތްތައް ކަނޑައެޅުމާއި، ޕީއެންއެފްގެ ޖަލްސާ ހުއްޓުވަން އެސްއޯ ފުލުހުން ބާރުގެ ބޭނުން ކޮށްފައިވާ ގޮތް، ޔޫސް އޮފް ފޯސް ރިވިއު ކޮމެޓީން ބަލާ އަޅަން ޖެހޭ ފިޔަވަޅު އެޅުމަށް ވެސް ރައީސް އަންގަވާފައިވާ ކަމަށް އެ މިނިސްޓްރީ އިން ވަނީ ބުނެފައެވެ.
ސަރުކާރުގެ ވިސްނުމަކީ އޯގާތެރި، ކުލުނުވެރި، ޕްރޮފެޝަނަލް އަދި ޖަވާބުދާރީވަނިވި ފުލުހުންގެ ހިދުމަތެެއް ރައްޔިތުންނަށް ފޯރުކޮށް ދިނުން ކަމަަށް ހޯމް މިިނިސްޓްރީ އިން ބުނެފައިވެއެވެ.
