މާލޭގައި އަނިޔާވެރި ގޮތަކަށް މަރާލި ޏ.ފުވައްމުލަކު، ޝިއާއު މުހައްމަދު ސައީދު(22)ގެ ހަށިގަނޑު ޕޯސްޓްމޯޓަމް ހަދަން ބޭރަށް ފޮނުވައިފިއެވެ.
ފުލުހުން ބުނީ ޝިއާއުގެ ހަށިގަނޑު ޕޯސްޓްމޯޓަމް ހެދުމަށް މިއަދު ބޭރަށް ފޮނުވާފައިވާ ކަމަށެވެ.
ޝިއާއުގެ ފުރާނަ ނެތް ހަށިގަނޑު ފެނުނީ މިދިޔަ ހޮނިހިރު ދުވަހުއެވެ. އޭނާގެ މަރާއި ގުޅިގެން، މަޝްހޫރު ސްކޭޓަރު، އަލީ ޝާހިލް(22) ވަނީ ހައްޔަރުކޮށްފައެވެ. އަދި ޝަރީއަތް ނިމެންދެން އޭނާ ބަންދުގައި ބަހައްޓަން ވަނީ އަމުރުކޮށްފައެވެ.
ދާދިފަހުން ބޭއްވި ނޫސްވެރިންގެ ބައްދަލުވުމެއްގައި ފުލުހުން ބުނީ މި މައްސަލާގައި ތުހުމަތުކުރެވޭ ސާހިލް ހައްޔަރުކުރިއިރު ހުރީ މަސްތުގެ ހާލަތުގައި ކަމަށާއި ނަމަވެސް އޭނާ އަދި މިހާތަނަށް ކުށަށް އިއުތިރާފް ވެފައި ނުވާ ކަމަށެވެ. އަދި އިތުރު މީހަކަށް މި މައްސަލާގައި ތުހުމަތު ނުކުރެވޭ ކަމަށާއި ހަމަލާދޭން ބޭނުންކުރި ހަތިޔާރުތައް ތަހުގީގަށް ހޯދިފައިވާ ކަމަށްވެސް ފުލުހުން ބުނެއެވެ.
