ކުރިއަށް އޮތް ފަސް އަހަރަށް ރައްޔިތުންގެ މަޖިލީހަށް ހޮވަންވީ، ފާއިތުވި ފަސް އަހަރު ވެސް، ހަގީގީ މާނައިގައި އެއްވެސް ކަމެއް ކޮށް ނުދެވުނު ބައެއްތޯ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސުވާލު އުފައްދަވައިފިއެވެ.
އެމަނިކުފާނު މިހެން ވިދާޅުވީ، ޕީޕީއެމް/ޕީއެންސީގެ ޓިކެޓުގައި ހެންވޭރު އުތުރު ދާއިރާ އަށް ވާދަ ކުރައްވާ ކެންޑިޑޭޓު އަހުމަދު އައިފާންގެ ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ.
އެހެން ސަރުކާރުން ކަން ކުރާ ގޮތަށް، ރިޔާސީ އިންތިހާބު ކައިރިވުމުން ކަންކަން ކުރުމަކީ އެމަނިކުފާނު ބޭނުންފުޅުވެލައްވާ ގޮތެއް ނޫން ކަމަށް ރައީީސް ރޭ ވިދާޅުވިއެވެ.
މާލެއާއި އެ ސިޓީގައި އުޅޭ އެހެން ރަށްތަކުގެ ރައްޔިތުންނަށް ދިމާވެފައިވާ ގެދޮރުގެ މައްސަލަ ހައްލު ކުރަން ގޯތި ދިނުމުގެ މަސައްކަތް ކުރިއަށްދާކަން ފާހަގަކުރައްވައި، ގުޅީފަޅުގެ އެއްބައި ހިއްކާ ނިމި، ގިރާވަރުފަޅު ހިއްކައި، ފުށިދިއްގަރުފަޅު ވެސް ހިއްކަން ނިންމާފައިވާކަން ރައީސް މުއިއްޒު ފާހަގަކުރެއްވިއެވެ.
ވެރިކަމުގެ ކުރީކޮޅު މި ކަންކަން ފެއްޓެވިއިރު، ރިޔާސީ އިންތިހާބު ކައިރިވުމުން ކަންކަން ފަށަން ބޭނުންފުޅުނުވާ ކަމަށް އެމަނިކުފާނު ވަނީ ތަކުރާރުކޮށް ވިދާޅުވެފައެވެ.
”އަޅުގަނޑު ވައުދުވީ މި ދައުރު ނިމެންވާއިރު، މާލޭގަ، ޖުމްލަކޮށް ރާއްޖޭގަ، ނުބަހައްޓާނަމޭ، އެއްގެ މަދުވެގެން ނުލިބޭ އެކަކު ވެސް. އެކަން ކުރާ ކަމަށް ވަންޏާ، އަޅުގަނޑު އެބަ ޖެހޭ ދައުރުގެ ކުރީކޮޅު، މިކަން ފަށަން. އެހެންވެ، ފުރަތަމަ މަހު އެ އޮތީ، އެކަން ފަށާފައި.“ ދުށިދިއްގަރުފަޅު ހިއްކުމުގެ މަޝްރޫއުއަށް އިޝާރާތް ކުރައްވައި ރައީސް ވިދާޅުވިއެވެ.
ފުށިދިއްގަރުފަޅު ހިއްކަން ނިންމީ، ރައީީސް ވިދާޅުވި ގޮތުގައި ހުޅުމާލެ 3 އާއި ގުޅީފަޅާއި، ގިރާވަރުފަޅު އެކަނި ހިއްކައިގެން މާލެ ސަރަހައްދުގެ ގެދޮރުގެ މައްސަލަ ހައްލު ނުވާނެތީއެވެ.
ރައީސް ވިދާޅުވީ ސަރުކާރުން ތަރައްގީ ގެންނަން ކުރާ މަސައްކަތުގައި ރައްޔިތުންގެ މަޖިލީހުގެ ދައުރު ވަރަށް މުހިންމު ކަމަށާއި، މަޖިލީހުގެ އެއްބާރުލުން ލިބިއްޖެނަމަ، ގެދޮރުވެރިކަމުގެ މައްސަލައާއި އެހެނިހެން މުހިންމު މައްސަލަތައް ވެސް ހައްލު ކުރެވޭނެ ކަމަށެވެ.
އެގޮތުން ބަޖެޓު ފާސް ކުރުމާއިއެކު، ގެދޮރުގެ މައްސަލައިގެ ހައްލަށް ގާނޫނުތައް ވެސް ފާސް ކުރަން ޖެހޭ ކަމަށް ރައީީސް ވަނީ ވިދާޅުވެފައެވެ.
ަ
