މި އަހަރުގެ ރައްޔިތުންގެ މަޖިލީހުގެ އިންތިހާބުގެ ނަތީޖާ އަކީ މާލެ ސިޓީން، ތާރީޚު ބަދަލު ކޮށްލާނެ ނަތީޖާއަކަށް ހަދައިދިނުމަށް ރައީސް ޑރ.މުހައްމަދު މުއިއްޒު ގޮވާލައްވައިފިއެވެ.
ޕީޕީއެމް/ޕީއެންސީގެ ޓިކެޓުގައި ހެންވޭރު އުތުރު ދާއިރާ އަށް ވާދަ ކުރައްވަވާ އަހުމަދު އައިފާންގެ ކެމްޕެއިން ޖަލްސާގައި ރޭ ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، މާލޭގެ ރައްޔިތުން ޒަމާނުންސުރެ އެދި އެދި ތިބި ކަންކަން ކުރުމަށް އެމަނިކުފާނުގެ ސަރުކާރުން ގިނަ ކަންކަން ރާވައި، ވޭތުވެ ދިޔަ ހަތަރު، ފަސް މަސް ތެރޭގައި މަސައްކަތް ވެސް ފަށާފައިވާއިރު، ބާރު ސްޕީޑުގައި އެކަންކަން ކުރިއަށް ގެންދިޔުމަށް ރައްޔިތުންގެ މަޖިލީހުގެ އެއްބާރުލުން ވަރަށް ބޮޑަށް ބޭނުންވާ ކަމަށެވެ.
އަދި މާލޭގެ ރައްޔިތުން، އެ ސިޓީގެ 17 ދާއިރާ އަށް ވެސް، ތަރައްގީގެ ފިކުރުގައި، ސަރުކާރަށް އެއްބާރުލުން ދޭނެ ކެންޑިޑޭޓުންނަށް ވޯޓު ދެއްވުމަށް ވެސް ރައީސް ގޮވާލެއްވިއެވެ.
”މާލޭގެ ރައްޔިތުންނަށް ބޭނުންވެފައި މިއޮތް ގޯތި ގެދޮރު ޔަގީންވާނެ ފިކުރަށް، އަޅުގަނޑުމެންގެ ކެންޑިޑޭޓުންނަށް ވޯޓު ދެއްވާނެ ފަހަރަކަށް ހައްދަވާ، މި 17 ގޮނޑިއަށް ވެސް އަޅުގަނޑުމެންގެ ކެންޑިޑޭޓުން ހޮއްވަވައިދެއްވާ.“ ރައީީސް ވިދާޅުވިއެވެ.
ރައީސް ވިދާޅުވީ ޒުވާނުންނާއި، އިސްރަށްވެހިންނަށާއި ކަނބަލުންނަށް ބޭނުންވާ ކަންތައްތައް ފަހިކޮށްދިނުމަށް ސަރުކާރުން މަސައްކަތް ފަށާފައިވާ ކަމަށާއި، މިއީ ތަރައްގީ އާއިއެކު އަންނާން އޮތް ހަމަޖެހުމަށްޓަކައި ރައްޔިތުން އަތުކުރި އޮޅާލަންވީ ވަގުތު ކަމަށެވެ.
