ބައިނަލްއަގްވާމީ ޒުވާނުންގެ ދުވަހުގެ ހަރަކާތްތަކުގެ ތެރޭގައި ހިމެނޭ ސަގާފީ މަސަައްކަތްތެރިކަމާއި ގުޅޭ މައުރަޒު “ސަގާފީ މަސައްކަތް ދިރުވުން” ނައިބު ރައީސް ފައިސަލް ނަސީމް ހުޅުވައިދެއްވައިފިއެވެ.
މިމައުރަޒު ކުރިޔަށް ދަނީ ކުޅުދުއްފުށި ސިޓީގެ ޖަލާލުއްދީން ސްކޫލުގައެެވެ.
މައުރަޒު ހުޅުއްވައިދެއްވުމަށް ފަހުގައި ނައިބު ރައީސް ވަނީ މައުރަޒު ބައްލަވާލައްވާފައެވެ.
އެއް ދުވަހުގެ މުއްދަތަށް ކުރިޔަށް ގެންދާ މި ސަގާފީ މަސައްކަތްތެރި ކަމުގެ މައުރަޒުގައި ވަނީ، ދިވެހިންގެ ސަގާފީ މަސައްކަތްތަކާއި، ދިވެހިންގެ އުފެއްދުންތެރިކަމުގެ ބައެއް ތަކެތި ދައްކާލަން ބަހައްޓާފައެވެ.
މިގޮތުން ކަނބުރުވެރިކަމާއި ވަޑާމުގެ މަސައްކަތާއި ކަސަބުވިޔުމާއި ރޯނުވެށުން ފަދަ މަސައްކަތްތައް ކުރިޔަށްދާގޮތް ވެސް ދައްކާލާފައިވެއެވެ.
މިމައުރަޒުގެ މަގްސަދަކީ ޒުވާނުންނާއި އުމުރުން ދުވަސްވީ މީހުން ގުޅިގެން މަސައްކަތްކުރުމުގެ ރޫޙު އާލާކޮށް، އުމުރުން ދުވަސްވީ މީހުންގެ ފަރާތުން އަގުހުރި ހުނަރާއި އިލްމު ލިބިގަތުމުގެ ފުރުޞަތު، ޒުވާނުނަށް ހޯދައި ދިނުމެވެ.
ޒުވާނުންގެ ދުވަހާއި ގުޅިގެން ބާއްވާ މިމައުރަޒު ހުޅުއްވައިދެއްވުމުގެ ކުރިން، ނައިބު ރައީސް ވަނީ ކުޅުދުއްފުށީ ރީޖަނަލް ހޮސްޕިޓަލަށް ޒިޔާރަތް ކުރައްވާފައެވެ.
