ޒަމާނީ ފެންވަރަށް ޔޫތު ސެންޓަރުތައް ތަރައްގީ ވުމުން ދާއިމީ، ގިނަ ވަޒީފާތައް އުފެދިގެން ދާނެ ކަމަށް ޔޫތު މިނިސްޓަރު އިބްރާހީމް ވަހީދު(އަސްވާޑު) މިރޭ ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ރައްޔިތުންގެ ސުވާލުތަކަށް ވަޒީރުން ޖަވާބު ދެއްވުމަށް ގެންނަ ”އަހާ ފޯރަމް“ގައި މީހަކު ކުރި ސުވާލަކަށް ޖަވާބު ދެއްވަމުންނެވެ.
ރަށްރަށުގައި ގާއިމުކޮށްގައިވާ ޔޫތު ސެންޓަރުތަކުގެ ތެރެއިން ރަނގަޅަށް ހިންގަނީ ވަރަށް މަދު ތަނެއްކަން ފާހަގަކުރައްވައި މިނިސްޓަރު ވިދާޅުވީ އެ ތަންތަން ހިންގަމުންދަނީ ކުރީގެ މޮޑެލްއަކަށް ކަމަށާއި، މިހާރުގެ ޒުވާނުން ކުޅޭނެ ވަސީލަތްތައް ވެސް ނެތް ކަމަށެވެ.
އެހެންނަމަވެސް އަލަށް ގާއިމު ކުރާ ޔޫތު ސެންޓަރުތައް ހުންނާނީ، ޒުވާނުން އެދޭ ފެންވަރަށްކަން ފާހަގަކުރައްވައި މިނިސްޓަރު ވިދާޅުވީ، ވަޒީފާގެ އިތުރު ފުރުސަތުތައް އެތަންތަނުން ފަހިވެގެންދާނެ ކަމަށެވެ.
”ޔޫތު ސެންޓަރެއްގައި މި ހުންނަނީ އެންމެ ބޭފުޅެއް، އެހެންނަމަވެސް، އަޅުގަނޑު ގަބޫލު ކުރާ ގޮތުގައި، ރަނގަޅު ފެސިލިޓީސްތަކާ އެއްކޮށް އަލުން، ޔޫތު ސެންޓަރުތައް ގާއިމު ކުރެވިގެންދާއިރު، އެއް ވަޒީފާ ދެ ވަޒީފާއެއް ނޫނޭ، ހަމަ ރަށު ފެންވަރުގައި ރަނގަޅު ވަޒީފާތައް ތިބޭފުޅުންނަށް ލިބޭނެ.“
ރަށްރަށުގެ ޔޫތު ސެންޓަރުތަކުން ދާއިމީ ވަޒީފާތައް ލިބޭނެކަމް ފާހަގަކުރައްވައި އަސްވާޑު އިތުރަށް ވިދާޅުވީ، އެ ސެންޓަރުތަކަކީ، ރަނގަޅު ޒުވާން ޖީލެއް ބިނާ ކުރުމަށް މަގު ފަހިވާނެ ތަންތަނަށް ވެސް ވެގެންދާނެ ކަމަށެވެ.
