އިމާމުންނާއި ހަތީބުންނަށް ރާއްޖެއިން ބޭރުން އިތުރު ތަމްރީނު ދިނުމުގެ ޕްރޮގްރާމްގެ ދެވަނަ ބުރުގެ ބައިވެރިން މިއަދު ފުރައިފިއެވެ.
ރާއްޖެއާއި ރާއްޖެއިން ބޭރުން އިލްމުވެރިންނާއި އިމާމުންނާއި ހަތީބުން ތަމްރީންކުރުމުގެ ގައުމީ މަޝްރޫއު ފެށީ މި އަހަރުގެ ފެބްރުއަރީ މަހުގައެވެ.
އިސްލާމިކް މިނިސްޓްރީން ބުނީ، މި ޕްރޮގްރާމްގެ ދެވަނަ ބުރުގައި ހިމެނޭ 18 މީހުން މިއަދު ސައުދީ އަރަބިއްޔާއަށް ފުރާފައިވާ އިރު، މި ދަތުރަކީ މިމަހުގެ 17 ވަނަ ދުވަހާ ހަމައަށް ކުރިއަށް ދާ ދަތުރެއް ކަމަށެވެ.
މި ދަތުރުގައި ޢިލްމީ ޕްރޮގްރާމްތަކުގައި ބައިވެރިވުމުގެ އިތުރުން މައްކާ އަދި މަދީނާގެ ހާއްސަ ތަންތަނަށް ޒިޔާރަތްކުރާނެ ކަމަށް އިސްލާމިކް މިނިސްޓްރީން މުއުލޫމާތު ދެއެވެ.
އެ މިނިސްޓްރީން ބުނެފައި ވަނީ ސައުދީ އަރަބިއްޔާއާގެ އިތުރުން މިސްރު، މެލޭޝިޔާ، އަދި ބުރޫނާއިގެ އިތުރުން އިންޑޮނޭޝިއާއަށް ވެސް ތަޖުރިބާ އާއި ތަމްރީނުގެ ދަތުރު ކުރުމަށް ހަމަޖެހިފައިވާ ކަމަށެވެ.
މިއީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި 11 ސަރަހައްދަކަށް ބަހާލައިގެން ދާއިމީ އިމާމުންނަށް އަމާޒުކޮށްގެން ކުރިއަށްގެންދާ ޕްރޮގްރާމެކެވެ.
