ޕާކުކުރަން ދަތިވާ ގޮތަށް މާލޭގެ އެކި މަގުތަކުގައި ގަވާއިދާ ހިލާފަށް ޕެލެޓްތައް ބަހައްޓާ ނަމަ، އަންނަ މަހުގެ އެއް ވަނަ ދުވަހުން ފެށިގެން ޖޫރިމަނާކުރަން ނިންމާފައިވާ ކަމަށް މާލޭ ސިޓީ ކައުންސިލުން މިއަދު ބުނެފިއެވެ.
މަގުމަތީގައި ހުންނަ ޕެލެޓްތައް ނެގުމުގެ މަސައްކަތް ސިޓީ ކައުންސިލުން އަންނަނީ ކުރަމުންނެވެ.
އަދި ކައުންސިލާއި ފުލުހުން ގުޅިގެން މި ފަހުން ތައާރަފުކުރި ޕޮލިސް ކޮންސްޓެބިއުލަރީ ފޮނުވައިގެން ވެސް މީހުންނަށް ނަސޭހަތްދީ، ޕެލެޓް ނަގާފައި ހުންނާނެ ކަމަށް ކައުންސިލުން ބުންޏެވެ.
އެކަމަކު ކައުންސިލުން ބުނި ގޮތުގައި ޕެލެޓްތައް ނެގިޔަސް އަނެއްކާވެސް، ދެތިން ދުވަހުގެ ތެރޭގައި އަނެއްކާ ވެސް މަގުތަކުގައި ޕެލެޓްތައް ބަހައްޓައެވެ.
ނަސޭހަތް ދިނުމަށް ފަހު، އެކަން ރަނގަޅުނުކުރާ ނަމަ، އަންނަ މަހުގެ އެކަކުން ފެށިގެން އެ ފަރާތްތައް ޖޫރިމަނާކުރަން ވަނީ ނިންމާފައެވެ.
