އަތޮޅުތެރޭގެ އެކި ރަށްރަށުން މާލޭގެ ސްކޫލުތަކަށް ބަދަލުވާން އެދި 790 ކުދިންގެ ފޯމު ހުށަހަޅާފައިވާ ކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީން އިއްޔެ އާންމުކުރި ތަފާސްހިސާބުގައިވާ ގޮތުން މާލޭގެ ސަރަހައްދުގެ ސްކޫލުތަކުގެ ގްރޭޑް އެކަކަށް ވެއްދުމަށް 2،290 ފޯމު އަދި ގްރޭޑް އެކެއް ފިޔަވައި އެހެނިހެން ގްރޭޑްތަކަށް ވެއްދުމަށް 1،450 ފޯމް ހުށަހަޅާފައިވެއެވެ.
އޭގެ އިތުރުން މާލޭ ސަރަހައްދުގެ އެއް ސްކޫލުން އަނެއް ސްކޫލަށް ބަދަލުވުމަށް 660 ފޯމު ހުށަހަޅާފައިވާ ކަމަށް މިނިސްޓްރީން ބުނެއެވެ.
އެޑިއުކޭޝަނުން ބުނީ ރަށްރަށުން މާލޭގެ ސްކޫލްތަކަށް ބަދަލުވާން ބޭނުންވާ ކުދިންނަށާއި މާލޭގެ ސްކޫލްތަކުގެ ގްރޭޑް އެކަކަށް އަލަށް ވަންނަން ބޭނުންވާ ކުދިންނާއި މާލޭގެ އެކި ސްކޫލްތައް ބަދަލުކުރަން ބޭނުން ކުދިން ފޯމު ހުށަހެޅުމުގެ ސުންގަނޑިއަކީ އަންނަ އަންގާރަ ދުވަސް ކަމަށެވެ.
މި މަހުގެ ހަތަރެއްގެ ނިޔަލަށް ހުށަހަޅާފައިވާ ހުރިހާ ފޯމެއްގެ ޖަވާބު މި މަހުގެ 13 ވަނަ ދުވަހުގެ 14:00 ކުރިން ފޮނުވާނެ ކަމަށްވެސް ބުންޏެވެ.
