ރާއްޖޭގައި ތިބި ހުރިހާ އިންޑިއާ ސިފައިން ފައިބައިގެން ގޮސްފައިވާކަން ދިވެހި ސަރުކާރުން ރަސްމީކޮށް ހާމަކުރައްވައިފިއެވެ.
ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި މިކަން ހާމަކުރައްވައި، ޑިފެންސް މިނިސްޓަރު ޣައްސާން މައުމޫން ވިދާޅުވީ، ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެމަނިކުފާނުގެ ވައުދު ފުއްދަވާފައިވާ ކަމަށާއި، 10 މެއިގެ ނިޔަލަށް، ރާއްޖޭގައި ތިބި އިންޑިއާ ސިފައިން ފޮނުވާލެވިފައިވާ ކަމަށެވެ.
މިނިސްޓަރު ވިދާޅުވީ، އަމާން އޮމާންކަމާއިއެކު ޑިޕްލޮމެސީގެ އެންމެ ރީތި އުސޫލުތަކުގެ ތެރެއިން ރައީސް މުއިއްޒު އެމަނިކުފާނު ވެވެވަޑައިގެންނެވި ވައުދު ފުއްދަވާފައިވާތީ އެކަމަށް ވަރަށް ހޫނު މަރުހަބާއެއް ދަންނަވާކަމަށެވެ.
އިންޑިއާގެ ސިފައިންގެ ބަދަލުގައި އެ ގައުމުގެ މަދަނީ މުވައްޒަފުންތަކަށް އެ މަސައްކަތްތައް ކުރިއަށް ގެންދިޔުމަށް ފުރުސަތު ދީފައިވާ ކަމާއި ގުޅޭގޮތުން ކުރެވުނު ސުވާލަކަށްވެސް ޖަވާބު ދެއްވާފައެވެ.
ޣައްސާން ވިދާޅުވީ، ރައީސް މުއިއްޒު އެދިވަޑައިގަތީ ދިވެހިންގެ ގާބިލިއްޔަތު އިތުރުކުރަމުންދާ ދަނޑިވަޅެއްކަމަށްވުމުން އެއްވެސް އެހެން ގައުމެއްގެ ސިފައިން ރާއްޖޭގައި ނުތިބުމަށް ކަމަށެވެ.
ރައީސް ހިއްސާކުރެއްވީ ދިވެހި ރައްޔިތުން އެކަން ނޭދޭ ވާހަކަ ކަމަށްވެސް ވިދާޅުވިއެވެ.
”މި ވަގުތަށް އަޅުގަނޑުމެންނަށް އެއްބަސްވެވުނީ، އެ ޕްލެޓްފޯމްތައް ބޭނުން ކުރަން ޖެހިއްޖެ ހާލަތެއްގައި، ދެން ބޭނުންކުރާނީ، މަދަނީ މީހުން ބޭނުންކޮށްގެންކަން. މީގަ އެންމެ މުހިންމު ކަމަކަށް ފާހަގަކޮށްލަން ޖެހޭ އެއްކަމަކީ، އެ ޕްލެޓްފޯމްތަކުގަ ހިމެނޭ ހެލިކޮޕްޓަރު އުފެއްދި ކުންފުނީގެ މުވައްޒަފުން މި ތިބީ.“ ޣައްސާން ވިދާޅުވިއެވެ.
ރާއްޖޭގައި ތިބި އިންޑިއާ ސިފައިން ފޮނުވާލުމަކީ ރައީީސް މުއިއްޒުގެ އެންމެ މުހިންމު އެއް ވައުދުފުޅެވެ.
ރާއްޖޭގައި ތިބި އިންޑިއާ ސިފައިން، ކުރިން ހެލިކޮޕްޓަރުގައި ބަލި މީހުން އުފުލަމުން ދިޔަ ނަމަވެސް، ރައީީސް މުއިއްޒު ވެރިކަމާ ހަވާލުވެވަޑައިގަތުމަށްފަހު، އެއާ އެމްބިއުލާންސްގެ ހިދުމަތް ފައްޓަވައި، ވައިގެ މަގުން ބަލި މީހުން އުފުލުމުގައި އިންޑިއާއަށް ބަރޯސާ ވާން ނުޖެހޭ ގޮތް ހެއްދެވިއެވެ.
