ސިންގަޕޯ އެއަރލައިންސްގެ ފްލައިޓެއް ޓަރބިޔުލެންސްގައި ޖެހި ފަސިންޖަރަކު މަރުވެ, 71 މީހުން ވަނީ ޒަހަމްވި ހާދިސާއަށް ގިނަ ބައެއްގެ ސަމާލުކަން ހުއްޓުނެވެ.
އިއްޔެގެ ވަގުތެއްގައި ދަތުރު ކުރަމުން ދިޔަ ފްލައިޓު ޓަރބިޔުލެންސްގައި ޖެހުމުން އެ ބޯޓަށް މަޖުބޫރުވީ ތައިލެންޑުގެ ވެރިރަށް, ބެންކޮކުގެ ވައިގެ ބަނދަރުގައި ކުއްލި ހާލަތުގައި ޖައްސާށެވެ.
މި ހާދިސާ ހިނގީ ޔޫކޭގެ ވެރިރަށް ލަންޑަނުން ފުރައިގެން ސިންގަޕޫރަށް ފްލައިޓް ދަތުރު ކުރަމުން ދަނިކޮށެވެ.
ހާދިސާ ހިނގި ވަގުތު, މަތިންދާބޯޓުގެ ކެބިން ކްރޫއިން ދިޔައީ, ފަސިންޖަރުންނަށް ހެނދުނުގެ ނާސްތާ ދެމުންނެވެ.
ޓަރބިޔުލެންސްގައި ޖެހުމާއެކު ޕައިލެޓުން ވަނީ އިމަރޖެންސީގައި، ތައިލެންޑްގެ ބެންކޮކުގެ ސުވަރްނަޕޫމް އެއާޕޯޓުގައި ޖެއްސުމުގެ ހުއްދައަށް އެދިފައެވެ.
މި ހާދިސާގައި މަތިންދާބޯޓުގެ ކެބިންއަށް ބޮޑެތި ގެއްލުންތަކެއް ލިބުނެވެ. އަދި ލޮޅުން އެރި ވަގުތު، ފްލައިޓްގައި ތިބި މީހުން އެކި ދިމަދިމާލަށް ވިއްސައިގެން ދިޔައެވެ.
ބޮއިން 333-777 އީއާރް ފްލައިޓުން ދަތުރު ކުރި ފަސިންޖަރަކު ބުނީ، ހީވީ ފްލައިޓު ވެއްޓުނުހެން ކަމަށާއި، ޓާބިޔުލެންސްގައި ހޭދަވީ މަދު ސިކުންތު ކޮޅެއް ކަމުގައި ވިޔަސް، ފްލައިޓް ތެރޭގައި ފޯނާއި، އައިޕެޑްތަކާއި، ބާލީސްތަކާއި ތަށިތައް ވެސް ވިއްސައިގެން ގޮސް ސީލިންގައި ޖެހުނު މަންޒަރު ފެނުނު ކަމަށެވެ.
އެންމެން ކަހަލަ ގޮތަކަށް ބިރުން ހަޅޭލަވަމުން ދިޔައިރު، ބައެއް މީހުންގެ ބޮލަށް ވެސް ޒަހަމް ލިބި، މޫނުމަތިން ލޭ ފައިބާ މަންޒަރު ފެނުނު ކަމަށް އޭނާ ކިޔައިދިނެވެ.
