ދިވެހިބަހާ ސަގާފަތާއި ތަރިކައާ ބެހޭ ވުޒާރާގެ ނައިބު ވަޒީރު، ނޫސްވެރިޔާ މުހައްމަދު ސައީދު މޫސާ ވަޖުދީ ސަސްޕެންޑް ކޮށްފިއެވެ.
”އަސުރަށް“ މައުލޫމާތު ލިބިފައިވާ ގޮތުގައި، އޭނާ ސަސްޕެންޑް ކޮށްފައި ވަނީ ބަލަމުން އަންނަ ސުލޫކީ މައްސަލައަކާއި ގުޅިގެންނެވެ.
ބަލަމުން އަންނަނީ ސުލޫކީ ކޮން މައްސަލައެއްކަން ހާމަކޮށްފައެއް ނުވެއެވެ.މޫސާ ވަޖުދީ މަގާމުގެ މަސްއޫލިއްޔަތުން އެކަހެރިކޮށްފައިވާއިރު، އިއްޔެ ވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ މެނޭޖިން ޑިރެކްޓަރު ފާތިމަތު ތައުފީގާއި، ހައުސިން ޑިވެލޮޕްމަންޓް ކޯޕަރޭޝަން(އެޗްޑީސީ)ގެ ޗެއާމަން އަހުމަދު ޒުހޫރު ވެސް، މަގާމުން ވަކި ކޮށްފައެވެ.
ސްޕޯޓްސް މިނިސްޓްރީގެ ޑެޕިއުޓީ މިނިސްޓަރު ހުސައިން ޝިފާޒު ވެސް ސަސްޕެންޑްކޮށްފައި ހުރިކަން އިއްޔެ އެނގިފައިވެއެވެ. ޝިފާޒު ސަސްޕެންޑް ކުރީ އަހުލާގީ މައްސަލަތަކަކާ ގުޅިގެން ކަމަށް މައުލޫމާތު ލިބިފައިވެއެވެ.
