ދިރިއުޅުމުގެ ގޮންޖެހުންތައް ކުރިމަތިވާނެ ކަމަށާއި، އެފަދަ ހާލަތުގައި ކުރަންވީ ކަމަކީ ހަށި ފޮޅާލާފައި ތެދުވުން ކަމަށް ވިދާޅުވެ، ރައީސުލްޖުމްހޫރިއްޔާގެ ސްކޮލަރޝިޕާއި، ހައި އެޗީވާސް ސްކޮލަރޝިޕް ހާސިލު ކުރި ދަރިވަރުންނަށް ރައީސް ޑރ.މުހައްމަދު މުއިއްޒު ނަސޭހަތްތެރިވެވަޑައިގެންފިއެވެ.
ރައީސުލްޖުމްހޫރިއްޔާގެ ސްކޮލަރޝިޕާއި، ހައި އެޗީވާސް ސްކޮލަރޝިޕް ހާސިލު ކުރި ދަރިވަރުންނަށް ލިޔުން ދިނުމުގެ ހަފްލާގައި ރައީސް މުއިއްޒު ވިދާޅުވީ، ކުރާ ކަމެއްގައި ނާކާމިޔާބު ވެއްޖެ ނަމަ، ކާމިޔާބީ ހޯދަން ވަރުގަދައަށް އަޒުމް ކަނޑައަޅަން ޖެހޭ ކަމަށެވެ.
ރައީސް ވިދާޅުވީ، ނާކާމިޔާބީއާ ކުރިމަތިލާން ޖެހޭނީ ވެސް، ކަންކަމާ ކުރިމަތިލާން ނުކުންނަ މީހުންނަށް ކަމަށެވެ. ގޭގައި، ކަމެއް ނުކޮށް އޮންނަ މީހަކަށް، އެފަދަ ކަމެއްގައި ހެދޭނެ ގޯހެއް ނެތް ކަމަށް ވެސް އެމަނިކުފާނު ވިދާޅުވިއެވެ.
”އެއްގޮތަކަށް ވެސް، ދެން ހުރި މީހާ، ތިމަންނައަށް މި ކުރެވުނު ކަމާ ދޭތެރޭގައި މަލާމާތްކޮށް، ނޫނިއްޔާ، ކްރިޓިސައިޒް ކޮށްގެން، ހިތް މަރުވެގެން ނުވާނެ. މަލާމަތް ކުރަން ވެސް ފުރުސަތު ލިބުނީ، އެކަމުގަ ތިމަންނަ އުޅުނީމަ.“ ރައީސް ވިދާޅުވިއެވެ.
ރައީސް ވިދާޅުވީ، ކަމެއް ބަދަލު ކުރަން ނުވަތަ އިސްލާހު ކުރަން ނުކުމެ އުޅޭ މީހަކާ ގުޅޭގޮތުން ދޮގު ވާހަކަ ފެތުރުމާއި، ފާޑު ކިޔުން ވެސް އަމާޒު ވާނެ ކަމަށެވެ. އެހެންވެ، ކޮންމެ މީހަކީ ވެސް ކަންކަން ކުރާ މީހަކަށް ވުމަށް އެމަނިކުފާނު ނަސޭހަތްތެރިވެވަޑައިގެންނެވިއެވެ.
”މައިދާނުގަ ނުކުމެ، ކަންކަން އިސްލާހު ކުރުމުގަ، ކަންކަން ރަނގަޅު ކުރުމުގަ، ގައުމު ތަރައްގީ ކުރުމުގަ، މުޖްތަމައު ރަނގަޅު ކުރުމުގަ، އާއިލާ ބިނާ ކުރުމުގައި، ދަރިންނަށް ހެޔޮ ގޮތް ހޯދައިދިނުމުގައި، މައިންބަފައިންނަށް ރަނގަޅު ގޮތް ހޯދައިދިނުމުގައި، އަމިއްލަ ހަޔާތަށް ރަނގަޅު ގޮތްތައް ހޯދައިދިނުމުގައި ކުރިއަށްދާ މީހަކަށް.“ ރައީީސް ވިދާޅުވިއެވެ.
ރައީސް ވަނީ ކޮންމެ ކުއްޖަކުވެސް ގައުމަށް ހިދުމަތްކުރުމަށް ބާރުއަޅުއްވާފައެވެ. މަތީ ތައުލީމު ހާސިލުކުރާ ފަރާތްތަކަށް އަންނަ އަހަރުން ފެށިގެން ފަހި ފުރުސަތުތަކެއް މިސަރުކާރުން ހުޅުވައިލައްވާނެކަމުގައި ފާހަގަކުރައްވައި ރައީސް ވިދާޅުވީ ދިވެހީންނަށް ހާއްސަ ވަޒީފާތައް ގިނަކޮށް، އަދާކުރާ ވަޒީފާއާ އެކަށީގެންވާ ރަނގަޅު މުސާރައެއް ދިނުމަށް ސަރުކާރުން ވަރަށް ބޮޑު އިސްކަމެއް ދޭ ކަމަށެވެ. އަދި މިސަރުކާރުގެ ވައުދާ އެއްގޮތަށް ގައުމު ބިނާކުރަން އިސްކަން ދޭގޮތަށް މީހުން ބިނާކުރަން ދައުލަތުގެ ބަޖެޓުން ހާއްސަ ސަމާލުކަމެއް ދެއްވާނެކަމުގައި އެމަނިކުފާނު ވިދާޅުވިއެވެ.
