އިޖުތިމާޢީ އަދި އާއިލީ ތަރައްގީއާ ބެހޭ ވުޒާރާއިން ކުރިއަށްގެންދާ ”ހާލު ކިހިނެއް؟“ ޕްރޮގްރާމުގެ ދަށުން ގއ. ކަނޑުހުޅުދޫގެ ހުރިހާ ގެތަކަށް ޒިޔާރަތްކޮށް އާއިލާތަކުގެ ހާލު ބަލައިފިއެވެ.
ކަނޑުހުޅުދޫއަކީ 1004 މީހުންގެ އާބާދީއެއް އޮތް ރަށެކެވެ. އެހެން ނަމަވެސް ރަށުގައި މިހާރު ދިރިއުޅެމުންދަނީ 565 މީހުންނެވެ. އޭގެ ތެރޭގައި ނުކުޅެދުންތެރިކަން ހުންނަ 27 ފަރާތަކާއި، 65 އަހަރުން މަތީގެ 36 މީހުން ރަށުގައި އެބަތިއްބެވެ.
މި އެންމެންނަށް ވެސް މިހާރު ދައުލަތުގެ ސޯޝަލް ޕްރޮޓެކްޝަން ނިޒާމުގެ ތެރެއިން މާލީ އެހީތެރިކަން ފޯރުކޮށްދެމުންދާކަން ”ހާލު ކިހިނެއް؟“ ޕްރޮގްރާމުގެ ތެރެއިން ވަނީ ކަށަވަރުކުރެވިފައެވެ.
ކަނޑުހުޅުދޫގައި މީހުން ދިރިއުޅޭ 102 ގެ ހުރިއިރު، 97 ގެ އަށް ވަނީ ޒިޔާރަތްކުރެވި، އާއިލާތަކުގެ ހާލު ބެލިފައެވެ. ތިން ގެއިން ވަނީ މައުލޫމާތު ހިއްސާކުރަން ބޭނުން ނުވާކަމަށް ބުނެފައެވެ. އޭގެ އިތުރުން ދެ އާއިލާއެއްގެ ދިރިއުޅުން މިވަގުތު ވަނީ ރާއްޖެއިން ބޭރަށް ބަދަލުކޮށްފައެވެ.
ކަނޑުހުޅުދޫގެ ގެތަކަށް ކުރި ޒިޔާރަތްތަކުގައި ރައްޔިތުންގެ ފަރާތުން ލިބުނު މައުލޫމާތައް ބަލާއިރު، ރައްޔިތުންގެ އެންމެ ބޮޑު ކަންބޮޑުވުމެއްގެ ގޮތުގައި ފާހަގަކުރެވިފައި ވަނީ ގެދޮރު ބިނާކުރުމުގައި ދިމާވާ ދަތިތަކުގެ މައްސަލައެވެ.
އެކަށީގެންވާ ބޯހިޔާވަހިކަމެއް ނެތުމުން ގިނަ އާއިލާތަކެއް އެއްތަނެއްގައި އުޅެން ޖެހުމާއެކު ދިމާވާ އިޖުތިމާއީ މައްސަލަތައް ހުރިކަން ކަނޑުހުޅުދޫގެ ގެތަކަށް ކުރި ޒިޔާރަތްތަކުން ވަނީ ދެނެގަނެވިފައެވެ.
މި ކަންކަން ހައްލުކޮށް، ރަށުގެ އިޖުތިމާއީ ދުޅަހެޔޮކަން ކަށަވަރުކުރުމަށް ކުރާނެ ކަންކަމާއި ގުޅޭ ގޮތުން ކަމާ ގުޅުންހުރި އިދާރާތަކާއެކު މިހާރު ވަނީ މަޝްވަރާތައް ކުރެވެމުންނެވެ.
