ސޮވެރިން ޑިވެލޮޕްމަންޓް ފަންޑަށް މި ސަރުކާރުން 65 މިލިއަން ޑޮލަރު ޖަމާކޮށްފައިވާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ، މިނިވަން ދުވަހުގެ މުނާސަބަތުގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ. އެމަނިކުފާނު ވެރިކަމާ ހަވާލުވެވަޑައިގެންނެވިއިރު، އެ ފަންޑުގައި ހުރީ ދެ މިލިއަން ޑޮލަރުކަން ރައީސް ފާހަގަކުރެއްވިއެވެ.
”މިއީ ދަރަނި ދެއްކުމަށްޓަކާ ސަލާމަތް ކުރާ ފައިސާ. އަޅުގަނޑުމެންގެ އިގްތިސޯދީ އެޖެންޑާއެއް މި އޮތީ، އިގްތިސޯދީ ސިޔާދަތު ޔަގީން ކުރުމަށްޓަކާ.“ ރައީސް ވިދާޅުވިއެވެ.
ރައީސްގެ ވާހަކަފުޅުގައި އާމްދަނީ ހޯދުމަށް ސަރުކާރުން އެކި މަސައްކަތްތައް ކުރަމުން އަންނައިރު، ޖޫން މަހުގެ ނިޔަލަށް، އާމްދަނީގެ ގޮތުގައި 18.6 ބިލިއަން ރުފިޔާ ހޯދިފައިވާކަން ފާހަގަކުރެއްވިއެވެ. ރައީސް ވިދާޅުވީ، މި ފައިސާގެ ތެރެއިން ބޮޑު މިންވަރެއް ދައުލަތް ހިންގުމަށް ހޭދަވީއިރު، މިއީ ފައިސާ ޗާޕު ނުކޮށް ކުރި ހަރަދު ކަމަށެވެ.
ރައީސް ވިދާޅުވީ ކުރީ ސަރުކާރުން، އެކި ފަރާތްތަކަށް ބަދަލުގެ ގޮތުގައި 2.4 ބިލިއަން ރުފިޔާ ދިން ކަމަށާއި، އެއާ ޚިލާފަށް، އެމަނިކުފާނުގެ ސަރުކާރުން މި ފާއިތުވި 08 މަސް ތެރޭގައި ބަދަލުގެ ގޮތުގައި އެންމެ ރުފިޔާއެއް ވެސް ދީފައި ނުވާނެ ކަމަށެވެ.
