ދިވެހިރާއްޖޭގައި ބޭރުގެ ސިފައިން ތިބި ކަމަށް ބުނެ، މިހާރު އެ ވާހަކަ ދައްކާ ބަޔަކު ދައްކަނީ ސަމާލުކަން ހޯދުމަށް ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އިބްރާހީމް ޝުޖާއު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޝުޖާއު މިހެން ވިދާޅުވީ، ރާއްޖޭގެ ދިފާއީ ސިޔާދަތު ކަށަވަރުކުރުމުގެ ގޮތުން ކުރެވުނު ފުރަތަމަ މަސައްކަތަކީ ރާއްޖޭގައި ތިބި ބޭރުގެ ސިފައިން ރާއްޖެއިން ގެންދިއުމުގެ މަސައްކަތް ކަމަށާއި އިންޑިއާއާއެކު އޮތް ގާތްގުޅުމުގެ ތެރެއިން އެކަން މިހާރު ހާސިލުކުރެވިފައިވާކަމުގައި ރައީސް ޑރ.މުހައްމަދު މުއިއްޒު ރޭ ވިދާޅުވުމާ ގުޅިގެންނެވެ.
މިނިވަން ދުވަހުގެ ހާއްސަ ޖަލްސާގައި ރައީސް މުއިއްޒު ރޭ ވިދާޅުވީ، އިންޑިޔާ ސަރުކާރުން ރާއްޖެއަށް ފޯރުކޮށްދީފައިވާ ޕްލެޓްފޯމުތަކުގައި ތިބި މިލިޓަރީ މީހުން ގެންގޮސް، މަދަނީ މީހުން ބޭނުންކޮށްގެން މިހާރު އެ ޕްލެޓްފޯމުތައް ބޭނުންކުރަން ފަށާފައިވާ ކަމަށެވެ.
އެގޮތުން މަދަނީ މީހުން ބޭނުންކޮށްގެން އޮޕަރޭޓްކުރަން ފެށިފަހުން ބަލިމީހަކު ގޮވައިގެން ހަނިމާދޫން މާލެއަށް ފުރަތަމަ ފްލައިޓް ރޭ ދަތުރުކޮށްފައިވާކަމުގައި ވެސް ރައީސް ވިދާޅުވިއެވެ.
އިންޑިއާ ސިފައިން ރާއްޖެއިން ފޮނުވާލެވުނުކަމުގެ ޔަގީންކަން ރައީީސް ދެއްވިއިރު، ޝުޖާއު ވިދާޅުވީ، ސިފައިން އަދިވެސް ތިބި ކަމަށް ބުނެ، އެ ވާހަކަ ދައްކަނީ ސިޔާސީ ގޮތުން ސަމާލުކަން ބޭނުންވާ މީހުން ކަމުގައެވެ.
”ކޮންމެ ސިޔާސީ މީހަކަށްވެސް މިއަދު މިވާގޮތަކީ އެމީހަކަށް ނުކުރެވުނު ކަމެއް ރައީސް ޑރ.މުއިއްޒު ސާބިތުކަމާއެކު ކުރެއްވީމަ މިކަމާ މިނައްޓަނީ.“ ޝުޖާއު ވިދާޅުވިއެވެ.
ރޭގެ ވާހަކަފުޅުގައި ރައީސް މުއިއްޒު ވަނީ ރާއްޖޭގެ މިނިވަންކަމުގެ ރަތްރޮނގު، ފަވާލެވިފައިވާ ރަތްރޮނގެއްގެ ގޮތުގައި ތާއަބަދަށް ދަމަހައްޓައި ގައުމުގެ މިނިވަންކަން ކަށަވަރުކޮށްދިނުމަކީ ފަހުރެއްގެ ގޮތުގައި އެމަނިކުފާނު ދެކިވަޑައިގަންނަވާ ކަމަށް ވެސް ވިދާޅުވެފައެވެ.
