ރައްޔިތުންގެ މަޖިލީހަށް އިދިކޮޅު މެމްބަރުން ހުށަހެޅި އެތައް ކުއްލި މައްސަލައެއް 20 ވަނަ ރައްޔިތުންގެ މަޖިލީހުން ބަލައިގެންފައިވާނެ ކަމަށް މަޖިލީހުގެ ހެންވޭރު އުތުރު ދާއިރާގެ މެމްބަރު އަހުމަދު އައިފާން ވިދާޅުވެއްޖެއެވެ.
ޓީވީ ޕްރޮގްރާމެއްގައި ވާހަކަ ދައްކަވަމުން އައިފާން ވިދާޅުވީ، މިހާރު ސަރުކާރާ އިދިކޮޅު އެމްޑީޕީއަށް މަޖިލީހުގެ ސުޕަރ މެޖޯރިޓީ ލިބިފައި އޮތްއިރު، އޭރު އިދިކޮޅު ޕީޕީއެމަށް މަޖިލީހަށް ކުއްލި މައްސަލަ ހުށަހަޅަން ފުރުސަތު ނުދިން ކަމުގައި ވިޔަސް، ޕީއެންސީގެ ”ބިޔަ“ ސުޕަރމެޖޯރިޓީން އެގޮތަށް އަމަލު ނުކުރާ ކަމަށެވެ.
”ޕީޕީއެމްގެ މަޖިލިސް މެމްބަރުން ހުށަހެޅި މައްސަލަތައް ބޭރުކޮށްލި ގޮތަކަށް އަޅުގަނޑުމެން ބޭރެއް ނުކޮށްލަމޭ، އެއީ އެ ބޭފުޅުންގެ އަޑު އަހަން.“ އައިފާން ވިދާޅުވިއެވެ.
ަރައްޔިތުންގެ މަޖިލީހުގެ ކޮމެޓީތައް އެކުލަވާލެވިފައިވާ ގޮތަށް ބެލިޔަސް، އިދިކޮޅު އެމްޑީޕީއާއި، މަޖިލީހުގެ އެހެނިހެން ސިޔާސީ ޕާޓީތަކާއި، މިނިވަން މެމްބަރުންނަށް ވެސް ފުރުސަތު އޮތްކަން ފެންނާނެ ކަމަށް އައިފާން ވަނީ ވިދާޅުވެފައެވެ.
އޭނާ އިތުރަށް ވިދާޅުވީ، މަޖިލީހުގައި މިހާރު ޒިންމާދާރުކަމާއެކުގައި މަސައްކަތް ކުރަމުންދާ އިދިކޮޅު ޕާޓީއެއް ނެތެވެ. އެމްޑީޕީގެ މެމްބަރުން ”ޗަރުކޭސް“ ޖެހުމަށް، އެއްވެސް އިހުލާސްތެރިކަމެއް ނެތި، މަޖިލީހަށް ކުއްލި މައްސަލަތައް ހުށަހަޅަމުންދާ ކަމަށް ވެސް އައިފާން ވިދާޅުވިއެވެ.
