ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސިފައަށް ފުރައްސާރަކޮށް ޕީއެންއެފްގެ ސެކްރެޓަރީ ޖެނެރަލް އަދި ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހު ޖަމާލު ދެއްކެވި ވާހަކަތަކަށް އާއްމުންގެ ފާޑުކިޔުންތައް އަމާޒުވުމުން، ”ހަޖަމު ކުރަން އުނދަގޫ ވެގެން ނުވާނެ“ ކަމަށް ވިދާޅުވެ، ޕީއެންއެފްގައި އިސްކޮށް އުޅުއްވާ ކުރީގެ ނައިބު ރައީސް ޑރ.މުހައްމަދު ޖަމީލު އަހުމަދު ރައީސް މުއިއްޒުއަށް ފާޑު ވިދާޅުވެއްޖެއެވެ.
ޕީއެންއެފް އިން އެންމެ ފަހުން ބޭއްވި ޖަލްސާގައި މަލީހު ވަނީ ރައީސް މުއިއްޒު ކައިވެނި ބައްލަވައިގަންނަވަން އެމަނިކުފާނުގެ އަނބިކަނބަލުން ސާޖިދާ މުހައްމަދަށް ހުށަހެޅުއްވުމުން، އެކަމަނާގެ މަންމަގެ ހިޔާލު ހޯއްދެވި ހޯއްދެވުމަށް އިޝާރާތް ކުރައްވައި، ރައީސް މުއިއްޒުގެ ސިފައަށް ވަރަށް ބޮޑަށް މަލާމާތް ކުރައްވައިފައެވެ.
އެ މަންޒަރު ފެންނަ ވީޑިއޯ ވައިރަލް ވެފައިވާއިރު، ވީޑިއޯއާ ގުޅިގެން އެތައް ބަޔަކު ބުނަމުން ދަނީ މިއީ މަލީހުއާއި ޕީއެންއެފްގެ އިސް ވެރިންގެ ފަރާތުން ފެނުނު ވަރަށް ދަށު ދަރަޖައިގެ އަމަލެއް ކަމުގައެވެ.
ނަމަވެސް އެކްސްގައި ކުރެއްވި ޕޯސްޓެއްގައި ޖަމީލު ވިދާޅުވީ، މިއީ ޕަބްލިކްގައި ހުރި ވާހަކަތައް ކަމަށާއި، ”ހަޖަމުވާން ޖެހޭނެ“ ކަމަށެވެ.
މުޅި ފައުޖު ނެރެ ޑިފެންސަށް ކުޅެން ފެށުމުން ސިޔާސީ ގޮތުން ހަންބޯ ނޫންކަންވެސް އެނގިއްޖެ. ނާގާބިލު ވެރިއެއް! ނާގާބިލު! ޖަމީލު ވިދާޅުވިއެވެ.
ޖަމީލު ތުހުމަތު ކުރެއްވި ގޮތުގައި، ރައީސް މުއިއްޒުއާ ޒާތީ ގޮތުން ޖައްސާލައި، އެމަނިކުފާނުގެ ސިފައަށް ފުރައްސާރަ ކުރުމުން، ސަރުކާރުގެ އިސް ބޭފުޅުން ކުޅުއްވަނީ ޑިފެންސަށެވެ.
ނަމަވެސް ރައީީސްގެ ސިފައަށް ހަޖޫ ޖެހުމުން، މީސްމީޑިއާގައި ޕީއެންއެފަށް އެންމެ ގިނަ ފާޑުކިޔުންތައް އަމާޒު ކުރީ، އާއްމު ރައްޔިތުންނެވެ. މިއީ އެ ޕާޓީގެ އިސް ބޭފުޅެއްގެ ފަރާތުން ފެނުނު ވަރަށް ނާތަހުޒީބު އަމަލެއް ކަމަށް ގިނަ މީހުން ބުނެފައިވެއެވެ.
އަދި މިއީ ގައުމު ހިންގުމުގެ ފުރުސަތު ދޭން ރައްޔިތުން ކައިރީގައި އެދޭ ބައެއްގެ ފަރާތުން ފެނިގެންވާނެ މަންޒަރެއް ނޫން ކަމަށް ވެސް ސޯޝަލް މީޑިއާގައި ޝުއޫރު ފާޅު ކުރި ގިނަ މީހުން ވަނީ ބުނެފައެވެ.
