ރައްޔިތުންގެ ވިންދާއި އިހުސާސް ހުރި ގޮތް ދެނެގަތުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިރުޝާދު ދެއްވާ ކަމުގައި ނައިބު ރައީސް ހުސެއިން މުހައްމަދު ލަތީފު ވިދާޅުވެއްޖެއެވެ.
ޕީއެންސީން މިރޭ ބޭއްވި ހަރުގެ ޖަލްސާގައި ވާހަކަފުޅު ދައްކަވަމުން ނައިބު ރައީސް ވިދާޅުވީ، ބާރުތައް ފެށިގެން އަންނަނީ ރައްޔިތުންގެ ކިބައިންކަމީ، ރައީސް މުއިއްޒު އަބަދުވެސް ހަނދުމަފުޅު ބަހައްޓަވާ ކަމެއް ކަމަށާއި އެމަނިކުފާނުގެ މެނިފެސްޓޯ އެކުލަވައިލެއްވީ ވެސް ރައްޔިތުން އެދޭ ކަންކަން ހިމަނުއްވައިގެން ކަމަށެވެ.
”މަސްވެރިންނާ ވާހަކަ ދެކެވި، ޒުވާނުންނާ ވާހަކަ ދެކެވި، ކަނބަލުންނާ ވާހަކަ ދެކެވި، އިސްރަށްވެހިންނާ ވާހަކަ ދެކެވި، އެބޭފުޅުން ބޭނުންވާ ގޮތަށް މެނިފެސްޓޯ އެމަނިކުފާނު ބައްޓަން ކުރެއްވީ.“ ނައިބު ރައީސް ވިދާޅުވިއެވެ.
އެމަނިކުފާނުގެ ވާހަކަފުޅުގައި، ރައީސް މުއިއްޒު އަކީ ރައްޔިތުންގެ އަޑު އެއްސެވުމުގައި އެންމެ ތަންކޮޅެއް ވެސް ފަހަތަށް ޖެހިވަޑައިގަންނަވާނެ ބޭފުޅެއް ނޫން ކަމަށް ވިދާޅުވިއެވެ.
އެކަމުގެ ހެއްކެއްގެ ގޮތުން ޔުނިވަރސިޓީގެ ކަންތައްތަކުގައި، އާއްމުންގެ ހިޔާލާ އެއްގޮތަށް ކަންކަން ބައްޓަން ކުރެއްވިކަން ނައިބު ރައީސް ފާހަގަކުރެއްވިއެވެ.
ނައިބު ރައީސް އިތުރަށް ވިދާޅުވީ، ރައީސް މުއިއްޒުގެ މެނިފެސްޓޯގައިވާ ކަންކަމަކީ ހާސިލު ކުރެވޭނެ ކަންކަން ކަމަށާއި، މި ސަރުކާރަކީ ތަފާތު ދައްކާނެ ސަރުކާރެއް ކަމަށެވެ.
