ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރާ، ރައީސް ޔާމީން އަބްދުލްގައްޔޫމް ދުރަށް ވަޑައިގަތީ، ރައީސް މުއިއްޒުގެ މައްޗަށް ހިނގާނީ ރައްޔިތުންގެ ބާރު ކަމަށް އެމަނިކުފާނު ވިދާޅުވުމުން ކަމަށް ރައްޔިތުންގެ މަޖިލީހުގެ ރައީސް، އަދި ޕީއެންސީގެ ޗެއާޕާސަން އަބްދުއްރަހީމް ވިދާޅުވެއްޖެއެވެ.
ޕީއެންއެފްގެ ހަރުގެ ޖަލްސާއެއްގައި ރައީސް ޔާމީން ވަނީ، އެމަނިކުފާނު ސަރުކާރާ ދުރަށް ވަޑައިގަތީ ގޯސް ހަދާތީ ހަޖަމު ނުވެގެން ކަމަށް ވިދާޅުވެފައެވެ. އެ ވާހަކަފުޅަށް ރައްދު ދެއްވައި، ކޮންގްރެސް ޕާޓީގެ މިރޭގެ ހަރުގެ ޖަލްސާގައި އަބްދުއްރަހީމް ވިދާޅުވީ އެހެން ބޭފުޅަކު ވެރިކަން ކުރައްވާތަން ބައްލަވަން ރައީސް ޔާމީންގެ ލަގޮނޑިއަށް ކެތްނުވީ ކަމަށެވެ.
އަދި ރިޔާސީ އިންތިހާބުން ލިބިވަޑައިގެންނެވި ކާމިޔާބީއާ ގުޅިގެން ރައީީސް މުއިއްޒު ރައްޔިތުންނަށް ޝުކުރު އަދާ ކުރެއްވުމުގެ ޖަލްސާ، ރައީީސް ޔާމީން އެންގެވި ގޮތަށް ފަސް ނުކުރެއްވުމަކީ ވެސް ރައީސް ޔާމީންއަށް ގަބޫލުނުކުރެއްވުނު ކަމެއް ކަމަށް އަބްދުއްރަހީމް ވިދާޅުވިއެވެ.
ރައީސް މުއިއްޒު ގޮވާލެއްވި ގޮވާލެއްވުމަށް އޭރުގެ ސަރުކާރުން ރައީސް ޔާމީން ގެއަށް ބަދަލު ކުރެއްވި ދުވަހު، އެމަނިކުފާނުގެ އިސްތިގްބާލުގައި އެންމެ ކުރީ ސަފުގައި ރައީީީސް މުއިއްޒު ހުންނެވިއިރު ވެސް، ރައީީސް ޔާމީން އަމަލު ކުރެއްވި ގޮތް، އެ ދުވަހުގެ ވީޑިއޯތަކުން ފެންނާނެކަން ވެސް އަބްދުއްރަހީމްގެ ވާހަކައިގައި ފާހަގަކުރެއްވިއެވެ.
“ ތިބޭފުޅުން ބައްލަވާލައްވާ، އެ ވީޑިއޯގަ، އެ ވިދާޅުވާ ވަރަށް ރައީީސް މުއިއްޒުއަށް ތާއީދު ކުރެއްވިނަމަ، އަދި އެ ވިދާޅުވާހާ ބޮޑަށް ރައީީީސް މުއިއްޒު ވެރިކަމަށް ގެންނަން ބޭނުންފުޅުވިނަމަ، އިންތިހާބު ނިމިގެން ފުރަތަމަ ފަހަރަށް ބައްދަލުވި ދުވަސް އެއީ ރައީސް މުއިއްޒުއާ ދޭތެރޭގަ، ރައީީސް ޔާމީން ކަންތައް ކުރެއްވި ގޮތް.“ އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ، ރައީީސް މުއިއްޒުއާ ވާހަކަ ނުދައްކަވައި، ރައީީސް ޔާމީން އެހެން ބޭފުޅުންނާ ސަލާން ކުރައްވަމުން ގެންދެވި ކަމަށާއި، އެއަށްފަހު އެނބުރިވަޑައިގެން، ރައްޔިތުންނަށް ޝުކުރު އަދާ ކުރުމުގެ ޖަލްސާ، ޔާމީން މިނިވަން ވުމުން ބާއްވަން އެންގެވި ކަމަށެވެ.
”އަޅުގަނޑު ދެންނެވިން ރައީީީސް މުއިއްޒު އެހެން ނުހައްދަވާށޭ، ވިދާޅުވާށޭ މިރޭ ޖަލްސާ ބާއްވާނަމޭ، ރައްޔިތުން އިންތިހާބު ކުރީ ރައީސް ޑރ.މުއިއްޒުއޭ. މުއިއްޒު ރައްޔިތުންނަށް ވެވަޑައިގެންނެވި ވައުދެއް، މިހާ އަވަހަށް ހަނދުމަފުޅު ނައްތަވާލައްވައިގެން ނުވާނޭ. ރައީީސް މުއިއްޒު ކުރިއަށް ޖެހިވަޑައިގެން ވިދާޅުވީ، ރައީީީސް ޔާމީން މިނިވަންވެވަޑައިގަތީމަ އަޅުގަނޑުމެން ބޮޑު ޖަލްސާއެއް ބާއްވާނީއޭ. އެކަމު މިރޭ، ޝުކުރު އަދާ ކުރުމުގެ ޖަލްސާ ބާއްވާނީއޭ. އެހިސާބުން ދެން އެ މޫނަށް އަރާ ފައިބަމުން ދިޔަ ކުލަޔާއި، ޖެއްސި ވައްތަރާ، ވީގޮތާ، އަޅުގަނޑު މިރެއަކު ދަންނަވާކަށް ނެތީން. އާނ އެހެންވެއްޖެއްޔާ ބާއްވާށޭ ވިދާޅުވެފަ ގެއަށް ވަޑައިގަތީ.“ އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ، މޫސުން ގޯޯސްވެ އެރޭ ޖަލްސާ ނުބޭއްވިގެން ޖެހިގެން އައި ދުވަހުގެ ރެއަށް ފަސްކުރަން ޖެހުނު ކަމަށެވެ.
އަދި އެޖަލްސާ ބޭއްވި ރޭ، ރައީީސް ޔާމީން، ސަރުކާރާ ގުޅުން ކަނޑާލީ ރައީސް މުއިއްޒުގެ މައްޗަށް އެއްވެސް މީހެއްގެ ބާރު ނުހިނގާނެ ކަމަށް ވިދާޅުވުމުން ކަމަށް ވެސް އަބްދުއްރަހީމް ވިދާޅުވިއެވެ.
”(ރައީސް މުއިއްޒު ވިދާޅުވީ) ތިމަންނަގެ މައްޗަށް ބާރު ހިނގާނީ ރައްޔިތުންގެ ބާރޭ. އެއީ މައިގަނޑު ސަބަބަކީ. އެއީ ރައީސް މުއިއްޒު ދޫކުރައްވާ ގެއަށް ވަދެވަޑައިގެންނެވި ސަބަބަކީ.“ އޭނާ ވިދާޅުވިއެވެ.
އެ ރޭގެ ޖަލްސާގައި ރައީސް މުއިއްޒު ރައްޔިތުންނާ ސަލާން ކުރައްވަން ހުންނަވަނިކޮށް ރައީސް ޔާމީން އެމަނިކުފާނަށް ގުޅުއްވި ކަމަށާއި، ފޯނު ނުނެންގެވިގެން ދެން ރައީސް ޔާމީން މެސެޖު ކުރެއްވީ ޔޫއޭއީއަށް ކަނޑައަޅުއްވާފައިވާ ސަފީރު، މުހައްމަދު ހުސެއިން ޝަރީފު (މުންދު)އަށް ކަމަށް އަބްދުއްރަހީމް ވިދާޅުވިއެވެ. ރައީސް ޔާމީން މުންދުގެ އަރިހުގައި ެއޭނާ ހުންނެވީ ރައީސް މުއިއްޒު ނުވަތަ ޔާމީން އާއެކުގައިތޯ އެއްސެވި ކަމަށް ވެސް އޭނާ ވިދާޅުވިއެވެ.
