ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އަވަށްޓެރި ބަންގްލަދޭޝްގެ ވަގުތީ ސަރުކާރުގެ ޗީފް އެޑްވައިޒަރުގެ މަގާމަށް އައްޔަނު ކުރި ޑރ. މުހައްމަދު ޔޫނުސް އައްޔަންކުރެއްވުމާ ގުޅިގެން ތަހުނިޔާ ފޮނުއްވައިފިއެވެ.
ރައީސް މުއިއްޒު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ، ދިގު މުއްދަތެއްގެ ރަހްމަތްތެރިއެއްގެ ހައިސިއްޔަތުންނާއި ގާތް ބައިވެރިއެއްގެ ހައިސިއްޔަތުން، ޑރ. ޔޫނުސްގެ ވެރިކަމުގެ ދަށުން ބަންގްލަދޭޝްގެ ރައްޔިތުންނަށް ފާގަތިކަން ލިބުމަށް ދިވެހިރާއްޖެއިން އެދޭ ކަމަށެވެ.
ބަންގްލަދޭޝްގެ ވެރިކަމާ ވަގުތީ ގޮތުން ހަވާލުވެވަޑައިގެންނެވި މުހައްމަދު ޔޫނުސް ވަނީ ނޮބެލް ސުލްހައިގެ އިނާމު ހޯއްދަވާފައެވެ. އޭނާ ހުވާ ކުރެއްވުމުގެ ކުރިން ވިދާޅުވީ، ބަންގްލަދޭޝް އަށް ދެވަނަ ފަހަރަށް މިނިވަންކަން ލިބިއްޖެ ކަމުގައެވެ.
ވަގުތީ ލީޑަރު ބޭނުންފުޅުވެލައްވަނީ، ވީ އެންމެ އަވަހަށް އިންތިޚާބު ބޭއްވުމަށް ކަމަށް ރިޕޯޓުތައް ބުނެއެވެ.
ބަންގްލަދޭޝްގައި އިންޓެރިމް ސަރުކާރެއް އެކުލަވާލައި ޑރ.ޔޫނުސް ޗީފް އެޑްވައިޒަރުގެ މަގާމަށް ހަމަޖައްސާފައިވާއިރު، އެ ގައުމުގެ ބޮޑުވަޒީރުގެ މަގާމުގައި ހުންނެވި ޝޭހު ހަސީނާ މަގާމުން އިސްތިއުފާ ދެއްވާ، ގައުމު ދޫކުރައްވާ އިންޑިއާއަށް ވަނީ ފިލާވަޑައިގެންފައެވެ.
ހަސީނާ އަށް އިސްތިއުފާ ދެއްވަން ޖެހިވަޑައިގަތީ، ވަޒީފާގެ ކޯޓާ ކަނޑައެޅުމާ ދެކޮޅަށް އެ ގައުމުގެ ދަރިވަރުންތަކެއް ފެށި މުޒާހަރާތައް ހޫނުވެ، އާއްމު ރައްޔިތުންގެ ތެރެއިން ގިނަ ބަޔަކު މަރުވުމާ ގުޅިގެންނެވެ.
