މިއަދު ރާއްޖޭގައި ފުރަތަމަ ފަހަރަށް އަންހެން ބޭފުޅަކު ލިޔުއްވާފައިވާ ހުތުބާއެއް އަޑުއިވިގެން ދިޔަކަން ފާހަގަކުރައްވައި މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް، ޑރ.އާއިޝަތު ޝިހާމް، ރައީސް ޑރ.މުހައްމަދު މުއިއްޒުއަށާއި، އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދަށް ޝުކުރު އަދާ ކުރައްވައިފިއެވެ.
ރާއްޖޭގެ ތާރީހުގައި ފުރަތަމަ ފަހަރަށް އަންހެން އިލްމުވެރިއަކު ލިޔުއްވި ހުތުބާ މިއަދު ވިދާޅުވެފައިވާއިރު، އެ ހުތުބާ ލިޔުއްވާފައިވަނީ އިސްލާމިކް މިނިސްޓްރީގެ ނައިބު އަލްއުސްތާޒް ހައްވާ ލަތީފްއެވެ.
މިކަމާ ގުޅިގެން މިނިސްޓަރު އާއިޝަތު ވިދާޅުވީ، މިއަދަކީ ތާރީހީ ދުވަހެއް ކަމަށާއި، އެކަމަނާ ލިޔުއްވި ހުތުބާ ބިނާ ކުރައްވާފައި ވަނީ އާއިލީ ގުޅުންތައް ދެމެހެއްޓުމުގެ މައްޗަށް ކަމުގައެވެ. އެކަމަށްޓަކައި އަލްއުސްތާޒާ ހައްވާ ލަތީފަށް މިނިސްޓަރު މަރުހަބާ ވިދާޅުވިއެވެ.
”އަދި ހަގީގީ މާނައިގައި އަންހެނުންނަކީ ގަދަރުވެރި، ޝަފުވެރި އެކި ދާއިރާތަކުން ހަމަހަމަ ފުރުސަތުތައް ލިބިގެންވާ ބަޔަކަށް ހެއްދެވުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރައްވަމުން ގެންދަވާ މަސައްކަތްޕުޅަށް ހާއްސަ ޝުކުރެއް އަރިސް ކުރަން.“ މިނިސްޓަރު ވިދާޅުވިއެވެ.
މީގެ އިތުރުން އިސްލާމިކް މިނިސްޓްރީން މިފަދަ ފުރުސަތެއް ފަހިކޮށްދެއްވި ކަމަށްޓަކައި މިނިސްޓަރު އާއިޝަތު ޝިހާމް ވަނީ ޑރ.ޝަހީމަށް ވެސް ޝުކުރު ދަންނަވާފައެވެ.
އަންހެނުން ބާރުވެރިކުރުވަން ސަރުކާރުން ކުރަމުންދާ މަސައްކަތްތަކުގެ ތެރެއިން، އެކި މުއައްސަސާތަކުގެ އިސް ވެރިންނަށް ވެސް އަންހެން ބޭފުޅުން އައްޔަނު ކުރައްވަމުންދާކަން ފާހަގަވެއެވެ. މިގޮތުން ކޮމިޝަނަރ ޖެނެރަލް އޮފް ކަސްޓަމްސްގެ މަގާމަށް ފާތިމަތު ދިޔާނާ ވަނީ އައްޔަނު ކުރައްވައިފައެވެ.
