ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގެންގުޅުއްވާ ހާރިޖީ ސިޔާސަތުގެ ސަބަބުން ދިވެހީންގެރާއްޖޭގެ ކުރިމަގު ފެންނަނީ ވަރަށް އުޖާލާކޮށް ކަމަށް ރައްޔިތުންގެ މަޖިލީހުގެ ރައީސް، އަދި ކޮންގްރެސް ޕާޓީގެ ޗެއާޕާސަން އަބްދުއްރަހީމް ވިދާޅުވެއްޖެއެވެ.
އަބްދުއްރަހީމް ވަނީ އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރު ރާއްޖެ ވަޑައިގެން ރައީސް މުއިއްޒުއާ ބައްދަލުކުރެއްވި މަންޒަރުތައް ފެންނަ ފޮޓޯތައް އެކްސްގައި ޕޯސްޓުކުރައްވައިފިއެވެ.
އެ ޕޯސްޓުގެ ކެޕްޝަނުގައި އަބްދުއްރަހީމް ލިޔުއްވީ ރައީސް ގެންގުޅުއްވާ ހާރިޖީ ސިޔާސަތުގެ ސަބަބުން ”ދިވެހިންގެރާއްޖެ“ ކުރިމަގު ފެންނަނީ ނިކަން އުޖާލާކޮށް ކަމަށެވެ.
ދިވެހިންގެރާއްޖެ 2023 ވަނަ އަހަރުގެ ރިޔާސީ އިންތިހާބުގައި ރައީސް ގެންގުޅުއްވި ސްލޯގަންއެވެ.
”މަނިކުފާނު ތިޔަ ގެންގުޅުއްވާ ހަރުދަނާ ޚާރިޖީ ސިޔާސަތުގެ ސަބަބުން ދިވެހީންގެ ރާއްޖޭގެ ކުރިމަގު ފެންނަނީ ނިކަން އުޖާލާކޮށް، ގައުމާ ރައްޔިތުންގެ ޙައްގުގައި ތިޔަކުރައްވާ މަސައްކަތްޕުޅަށާ ތިޔަ ދައްކަވާ ސާބިތުކަމަށް އައްސަރިބަހާ ސާބަސް ދަންނަވަން،“ އަބްދުއްރަހީމް ވިދާޅުވިއެވެ.
ޖައިޝަންކަރު ރާއްޖެއަށް ކުރައްވަމުންގެންދަވާ ދަތުރުފުޅުގައި ރައީސް މުއިއްޒުއާއި، ފޮރިން މިނިސްޓަރު މޫސާ ޒަމީރާ ބައްދަލު ކުރައްވާފައިވެއެވެ. އަދި އިންޑިއާގެ އެހީގައި ރާއްޖޭގައި ކުރިއަށް ގެންދާ ތިލަމާލެ ބްރިޖު މަޝްރޫއުގެ މަސައްކަތް ހިނގާ ގޮތްވެސް ބައްލަވާލައްވާފައިވެއެވެ.
