ރާއްޖެއިން އެމަނިކުފާނަށް ދަންނަވާފައިވާ މަރުހަބާއަށްޓަކައި، އިންޑިއާގެ ހާރިޖީ ވަޒީރު ސުބްރަމާނިއަމް ޖައިޝަންކަރު، ރައީސުލްޖުމްހޫރިއްޔާ ޑރ.މުހައްމަދު މުއިއްޒުއަށް ޝުކުރު އަދާ ކުރައްވައިފިއެވެ.
ޖައިޝަންކަރު ރާއްޖެއަށް ކުރެއްވި ދަތުރުފުޅާ ގުޅިގެން ސަލާމަތީ، ތަރައްގީ އަދި ސަގާފީގެ ރޮނގުން ދެ ގައުމުގެ ގުޅުން ބަދަހިވެގެން ގޮސްފައިވާ ކަމަށާއި، ދެ ގައުމުގެ ގުޅިގެން، މި ސަރަހައްދަށް އުޖާލާ، އަދި ފާގަތި މުސްތަގްބަލެއް ހޯދައިދެވޭނެ ކަމަށް ރައީސް މުއިއްޒު އެކްސްގައި ވިދާޅުވިއެވެ.
ރައީސް ކުރެއްވި ޕޯސްޓު ހިއްސާ ކުރައްވައި ޖައިޝަންކަރު ވިދާޅުވީ، ރައީސްގެ ހިތްހެޔޮ ބަސްފުޅަށް ޝުކުރު އަދާ ކުރައްވާ ކަމަށާއި، ދެ ގައުމުގެ ގުޅުން އިތުރަށް ބަދަހި ކުރުމަށް ތައްޔާރަށް ހުންނެވި ކަމަށެވެ.
ރާއްޖެއަށް ކުރެއްވި ރަސްމީ ދަތުރުފުޅަށްފަހު ޖައިޝަންކަރު މިހާރު ވަނީ އިންޑިއާ އަށް ފުރާވަޑައިގެންފައެވެ.
އެމަނިކުފާނު އިންޑިއާއަށް ފުރާވަޑައިގަތީ މިއަދު އައްޑޫ ސިޓީއަށް ވަޑައިގަތުމަށްފަހު، ގަން އެއާޕޯޓުންނެވެ.
ޖައިޝަންކަރު ރާއްޖެއަށް ކުރެއްވި މި ރަސްމީ ދަތުރުފުޅަކީ ރާއްޖޭގެ ޚާރިޖީ ވަޒީރު މޫސާ ޒަމީރުގެ ދައުވަތަކަށް ކުރެއްވި ދަތުރުފުޅެކެވެ.
މިއަދު އައްޑޫ ސިޓީއަށް ވަޑައިގެން އޭނާ ވަނީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ކްރެޑިޓް ފެސިލިޓީގެ ދަށުން ކުރިއަށްގެންދިޔަ އައްޑޫގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއު ނިންމައި، ރަސްމީކޮށް ސަރުކާރާ ހަވާލުކޮށްފައެވެ.
