ކުރީ ސަރުކާރުން ރިޔާސީ އިންތިހާބު ގާތްވެފައި ވަނިކޮށް، ކަނޑު ފަޅުން ދޫކުރި ބައެއް ގޯތި، މޫސުން ގޯސްވެ، ކަނޑު ގަދަވުމުން އޮޔާ ވެސް ދިޔަ ކަމަށް ވިދާޅުވެ ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު(ޓޮމް) ފާޑު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އެމްޑީޕީގެ މެމްބަރުން ވަނީ ”ބިންވެރިޔާ“ ސްކީމްގެ ދަށުން ދޫކުރި ގޯތިތައް ހަވާލު ކުރުން ލަސްވާ ކަމަށް ބުނެ، ހައުސިން މިނިސްޓަރު ޑރ.އަލީ ހައިދަރާ ސުވާލު ކުރައްވައިފިއެވެ.
މިކަމަށް އިޝާރާތް ކުރައްވައި، މަޖިލީހުގައި ޓޮމް ވިދާޅުވީ، ގޯތީގެ ވާހަކަ ދައްކަން އެމްޑީޕީގެ މެމްބަރުން ލަދު ގަންނާން ޖެހޭނެ ކަމަށާއި، ރިޔާސީ އިންތިހާބަށް މަސް ދުވަހަށް ވުމުން، ގޯތިތައް ދޫކޮށްފައި ހުރީ ކަނޑުފަޅުން ކަމުގައެވެ.
”އެމްޑީޕީން ރިޔާސީ އިންތިހާބުގެ ދެ ބުރު ދޭތެރޭގައާއި، ރިޔާސީ އިންތިހާބަށް އެއްމަސްވާން ކައިރިވިއިރު ގޯތި ދޫކޮށްފައި ހުރީ ކަނޑުން. އޭގެ ތެރެއިން ބައެއް ގޯތިތައް މިދިޔަ ގަދައިގެ ތެރޭގައި ހިނގައްޖެ އޮޔާ. އިއްޒަތްތެރި ރައީސް، ބައެއް ގޯތިތައް ހިނގައްޖެ، ގާދޫ ކޮލުން ނުކުމެގެން.“ ތޯރިގު ވިދާޅުވިއެވެ.
ތޯރިގު ވިދާޅުވީ، ރައީީސް އިބްރާހީމް މުހައްމަދު ސޯލިހުގެ ސަރުކާރުން ގޯތި ދޫކުރީ އެއްވެސް އިހުލާސްތެރި ކަމެއް ނެތި ކަމަށާއި، 18000 ގޯތި ދޫކުރިއިރު، ރިޔާސީ އިންތިހާބުގައި މާލެ ސަރަހައްދުން ސޯލިހަށް ލިބިވަޑައިގަތީ 13000 ވޯޓު ކަމަށެވެ. އެކަމުން ވެސް އެނގެނީ، ސަރުކާރުގެ އިހްލާސްތެރިކަން ނެތް ކަމަށް، ގޯތި ލިބުނު ރައްޔިތުން ވެސް ގަބޫލު ކުރާކަން ކަމުގައި ތޯރިގު ވިދާޅުވިއެވެ.
”ބިންވެރިޔާ“ ސްކީމްގެ ދަށުން ދޫކުރި ގޯތިތައް އަންނަ އޮކްޓޯބަރު މަހުގެ ނިޔަލަށް ހަވާލުކޮށް ނިންމުމަށް މި ސަރުކާރުން ދަނީ މަސައްކަތް ކުރަމުންނެވެ.
ި
ަ
