ކުރިއަށް އޮތް ދެ ދުވަހު ވެސް ބޯކޮށް ވާރޭ ވެހޭނެ ކަމަށް ބަލައި، މަގުތަކުން ފެން ހިންދުމަށާއި، ރައްޔިތުންނަށް އެހީވުމަށް އެމްއެންޑީއެފް އޮތީ ތައްޔާރަށް ކަމަށް ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވެއްޖެއެވެ.
ރާއްޖެއަށް މިހާރު ކުރަމުން އަންނަ ހުޅަނގު މޫސުމުގެ ވިއްސާރައިގައި، މިއަދު މެންދުރުން ފެށިގެން މާލެ އަށް އަންނަނީ ވާރޭ ވެހެމުންނެވެ.
މަގުތަކުން ފެން ހިންދުމުގެ މަސައްކަތުގައި ސިފައިންނާ ފުލުހުން ވެސް ހަރަކާތްތެރިވަމުން އަންނައިރު، މާލެ ސިޓީ ކައުންސިލުން ވެސް އަންނަނީ ގޭގެއަށް ފެން ވަންނަ މިންވަރު މަދު ކުރުމަށް ވެލި ބަސްތާ ޖެހުމުގެ މަސައްކަތް ކުރަމުންނެވެ.
ޕީއެސްއެމްއަށް ދެއްވި އިންޓަރވިޔުއެއްގައި މިނިސްޓަރު ޣައްސާން ވިދާޅުވީ، މަގުތަކުން ފެންހިއްކުމުގައި ފަޔަރ އެންޑް ރެސްކިއު ޓީމާއި މާލޭ އޭރިއާގެ ކޮމާންޑުން ވަނީ ސިފައިންގެ އެންމެ މަތީވެރިޔާ އަދި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވާފައި އޮތް އިރުޝާދާ އެއްގޮތަށް ފުރިހަމަޔަށް ތައްޔާރުވެފައި ކަމަށެވެ.
ސިފައިން ކުރަމުންގެންދާ މަސައްކަތުގައި މިވަގުތު ލިބެންހުރި ހުރިހާ ވަސީލަތެއް ބޭނުން ކުރަމުންދާ ކަމަށާއި ވާރޭވެހުން ހުއްޓާލާ ހިސާބުން މާލޭގެ މަގުތަކުގައި ފެންބޮޑުވުން ކޮންޓްރޯލް ކުރެވޭނެ ކަމަށް މިނިސްޓަރު ވިދާޅުވިއެވެ.
އަދި ކުރިއަށް އޮތް ދެ ދުވަހުވެސް ވިއްސާރަކަމަށް ލަފާކޮށްފައިވާތީ، ސިފައިން ޑިއުޓީތައް ބަހައިގެން ތައްޔާރީ ހާލަތުގައި ތިބޭނެކަމުގެ ޔަގީންކަން ވެސް ޣައްސާން ވަނީ ދެއްވާފައެވެ.
އެމްއެންޑީއެފުން ވަނީ މިހާރު ކުރަމުންދާ ވިއްސާރައިގައި އެހީތެރިކަން ހޯދުމަށް އެދޭ ފަރާތްތަކުން 115 އަށް ގުޅުމަށް އެދިފައެވެ.
