މާކަނޑުގެ ދިރުންތަކާއި ސަރަހައްދުތައް ހިމާޔަތްކޮށް ރައްކާތެރިކުރުމާއި އެތަންތަން ދެމެހެއްޓެނިވި ގޮތުގައި ބޭނުންކުރުމާ ގުޅޭ ބައިނަލް އަގުވާމީ މުއާހަދާ ”ބަޔޯޑައިވާސިޓީ ބިޔޯންޑް ނޭޝަނަލް ޖުރިސްޑިކްޝަން“ (ބީބީއެންޖޭ) މުއާހަދާގައި ރާއްޖެއިން ސޮއިކޮށްފިއެވެ.
މި މުއާހަދާގައި ރާއްޖެއިން ސޮއި ކުރީ އދ. ގެ މައިމަރުކަޒުގައި ބޭއްވި ހާއްސަ ރަސްމިއްޔާތެއްގައެވެ.
ރާއްޖެ ވެފައި ވަނީ އެ މުއާހަދާގައި ސޮއިކުރި 92 ވަނަ ގައުމަށެވެ. މުއާހަދާގައި ރާއްޖޭގެ ފަރާތުން ސޮއިކުރެއްވީ، އދ. އަށް ކަނޑައަޅުއްވާފައި ހުންނަވާ ރާއްޖޭގެ ދާއިމީ މަންދޫބު ޑރ. އަލީ ނަސީރު މުހައްމަދެވެ.
ސަރުކާރުން ބުނެފައިވަނީ މާ ކަނޑުގެ ސަރަހައްދު ހިމާޔަތް ކުރުމަށާއި ދެމެހެއްޓެނިވި ގޮތުގައި ބޭނުންކުރުމަށް މަގުފަހިކުރުވާ މި ކަހަލަ މުއާހަދާއެއްގައި ރާއްޖެ ފަދަ ޖަޒީރާ ގައުމަކުން ބައިވެރިވުމަކީ ވަރަށް މުހިންމު ކަމެއް ކަމަށެވެ.
މި މުއާހަދާގައި ސޮއިކުރަން ވަޒީރުންގެ މަޖިލީހުން ނިންމީ މިދިޔަ ފެބްރުއަރީ މަހުގެ 11 ގައެވެ.
އަދި މި މުއާހަދާގައި ސޮއިކުރަން ރައްޔިތުންގެ މަޖިލީހުން ސަރުކާރަށް ރުހުން ދިނީ މިދިޔަ މެއި މަހު 14 ގައެވެ.
މި މުއާހަދާގައި ހިމެނޭ މައިގަނޑު ކަންކަމަކީ ކަނޑުގެ ޖެނެޓިކް ވަސީލަތްތަކުގެ ފައިދާތައް ހަމަހަމަކަމާއި އިންސާފުވެރިކަމާ އެކު ބެހުމާއި ކަނޑުގެ ސަރަހައްދުތައް ހިމާޔަތްކޮށް ބެލެހެއްޓުމަށް ބޭނުންވާ އޭރިއާ ބޭސްޑް މެނޭޖްމަންޓް ޓޫލްސް އެކުލަވާލުމާއި ތިމާވެއްޓަށް ކުރާ އަސަރުތައް ވަޒަންކުރުމުގެ އިތުރުން މެރިން ޓެކްނޮލޮޖީގެ ދާއިރާއިން ކެޕޭސިޓީ އިތުރުކުރުމެވެ.
