ހދ.ހިރިމަރަދޫގެ ރައްޔިތުން އެހެން ރަށަކަށް ހިޖުރަކުރަން ބޭނުންވާކަން އެ ރަށު ކައުންސިލު މެމްބަރުން ހާމަ ކުރައްވައިފިއެވެ.
ލޯކަލް ގަވަމަންޓް މިނިސްޓަރު، އާދަމް ޝަރީފު އުމަރު އެ ރަށު ކައުންސިލާ ބައްދަލުކުރައްވައި ވިދާޅުވީ ހިރިމަރަދޫގެ ރައްޔިތުން އެހެން ރަށަކަށް ބަދަލުވުމަށް ނިންމާފައިވާ ކަމަށް މިއަދުގެ ބައްދަލުވުމުގައި ކައުންސިލު މެމްބަރުން ވިދާޅުވެފައިވާ ކަމަށެވެ.
”އަދި ރައްޔިތުން ( ބަދަލުވާން) ބޭނުންވަނީ ކ.ތުލުސްދޫއަށްކަން ފާހަގަކުރެއްވި.“ މިނިސްޓަރު ވިދާޅުވިއެވެ.
މިކަމާ ގުޅޭ އިތުރު ތަފްސީލެއް މިނިސްޓަރު ދެއްވައިފައެއް ނުވެއެވެ. ހިރިމަރަދޫއަކީ ވަރަށް ކުޑަ އާބާދީއެއް އޮންނަ ރަށެކެވެ. އެ ރަށުގެ އާބާދީގައި 600 ހަމަނުވާއިރު، އެކި ހިދުމަތްތައް ހޯދުމަށް އެ ރަށުގެ ގިނަ މީހުން ހދ.ކުޅުދުއްފުއްޓާއި މާލެއަށް ހިޖުރަ ކުރެއެވެ.
މި އަހަރުގެ ފެބްރުއަރީ މަހުގައި ރައީސް ޑރ.މުހައްމަދު މުއިއްޒު އެ ރަށަށް ވަޑައިގެން ރަށު ކައުންސިލާ ބައްދަލުކުރައްވައިފައިވެއެވެ.
އެ ބައްދަލުކުރެއްވުމުގައި ކައުންސިލުންވަނީ ރަށުގެ ތަރައްގީއަށްޓަކައި ކުރުމަށް ބޭނުންވާ ކަންކަން ރައީސްއާ ހިއްސާކުރައްވާފައެވެ.
އެގޮތުން ބަނދަރު ބޮޑުކުރުމަށް ބޭނުންވާކަމަށާއި، ކައުންސިލް އިދާރާގެ ޖާގައިގެ ދަތިކަމާއި، ބަޖެޓުގެ ދަތިކަން ފާހަގަކުރެއްވިއެވެ.
