މި ވެރިކަމުގެ ފުރަތަމަ ނުވަމަސް ދުވަހުގެ ތެރޭގައި ސްޕޯޓްސް މިނިސްޓްރީން ޕީއެސްއައިޕީ މަޝްރޫއުތަކަށް 118 މިލިއަން ރުފިޔާ ހަރަދު ކޮށްފައިވާ ކަމަށް ސްޕޯޓްސް މިނިސްޓަރު ރާފިއު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ. މިނިސްޓަރު ވިދާޅުވީ، މިދިޔަ އަހަރު ޕީއެސްއައިޕީ މަޝްރޫއުތަކަށް ހަރަދު ކުރެވިފައި ވަނީ 123 މިލިއަން ރުފިޔާ ކަމަށެވެ.
”މިދިޔަ 09 މަސް ދުވަސް ތެރޭގައި އެކި ޕްރޮޖެކްޓުތަކަށް ޖުމްލަ 118 މިލިއަން ރުފިޔާ އަޅުގަނޑުމެން ހަރަދުކޮށްފަވާނެ، އޭގެތެރޭގަ، ފުޓްބޯޅަ ދަނޑުތަކާ، ވޮލީ ކޯޓުތަކާ، އައުޓްޑޯ ޖިމް، މިކަހަލަ ވަސީލަތްތައް ގާއިމުކޮށްފައިވާނެ.“ މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، މިވަގުތު ރާއްޖޭގެ ހުރިހާ ރަށެއްގައި 264 މަޝްރޫއުއެއް ކުރިއަށްދާ ކަމަށެވެ. މި ސަރުކާރުން ވެރިކަމާ ހަވާލުވެ، އެންމެ ފުރަތަމަ ވެސް މަސައްކަތް ފެށީ، ހުރި ވަސީލަތްތައް ”ފަންކްޝަން“އަށް ގެނައުމުގެ މަސައްކަތް ކަމުގައި ރާފިއު ވިދާޅުވިއެވެ.
އެގޮތުން ސ.ހިތަދޫގެ ޒޯން ސްޓޭޑިއަމް ވަރަށް ފުރިހަމައަށް މަރާމާތު ކުރެވި، އެތަނުގައި އިންޓަރ ސްކޫލް އެތުލެޓިކްސް މުބާރާތް ބޭއްވިގެންދިޔަކަން މިނިސްޓަރު ފާހަގަކުރެއްވިއެވެ.
