މޭވާތަކުގެ ތެރެއިން ޕެއާސް އަކީ އޭގައި ގިނަ ފައިދާތަކެއް އެކުލެވޭ އެއްޗެކެވެ.
ރާއްޖޭގައި ވެސް އާއްމުކޮށް ލިބެން ހުންނަ ޕެއާސް އިން ލިބޭ ފައިދާތަކަށް ބަލާއިރު، މިއީ ކޮންމެހެން ވެސް ކެއުމުގައި ހިމަނަން ޖެހޭ މޭވާއެކެވެ. އެންޓިއޮކްސިޑެންޓްތަކާއި، ޕޮޓޭސިއަމް، ވިޓަމިން ސީ، އަދި ފައިބަރ ވެސް މި މޭވާގައި ހިމެނެއެވެ.
ޕެއާސް އަކީ ފައިބަރު ގިނަ މިންވަރަކަށް ހިމެނޭ މޭވާއެކެވެ. މިކަމުގެ ސަބަބުން، މި މޭވާ އާއްމުކޮށް ކައި އުޅޭ މީހުންގެ ހަޖަމުގެ ނިޒާމް ރަނގަޅަށް މަސައްކަތް ކުރުމަށް އެހީތެރިވެދެއެވެ.
ބަނޑު ހަރުވުމުގެ މައްސަލަ ދިމާވާނަމަ، ޕެއާސް ކެއުމަކީ ވަރަށް ބޭނުންތެރި ކަމެކެވެ.
ސިއްހީ މައުލޫމާތު ހިމެނޭ ލިޔުންތަކުގައިވާ ގޮތުން ޕެއާސް އަކީ ހަށިގަނޑުން ބަރުދަން ލުއި ކުރަން ބޭނުންވާ މީހުން ކެއުން ރަނގަޅު މޭވާއެވެ. މީގައި އެކުލެވޭ ފައިބަރ، އަދި ފެނުގެ ސަބަބުން ބަނޑު ފުރިފައި ހުންނަ ކަމުގެ އިހްސާސް ކުރުވައެވެ. އެހެންވެ، މިއީ މާ ގިނައިން ކެވުމުން ދުރުކޮށްދޭނެ މޭވާއެކެވެ.
ޕެއާސް އަކީ ވިޓަމިން ސީ ވެސް ލިއްބައިދޭ މޭވާއެކެވެ. މިއީ ގައިގެ ހަމުގެ ދުޅަހެޔޮ ކަމަށް ބޭނުންވާ ކޮލަޖެން އުފައްދައިދޭ ވިޓަމިންއެކެވެ.
އެހެންކަމުން އާއްމުކޮށް ޕެއާސް ކެއުމަކީ ގައިގެ ހަންގަނޑު ރީތިކޮށްދޭނެ ކަމެކެވެ.
މި ބަޔާާންކުރެވުނު ފައިދާތައް ލިބިގަތުމަށްޓަކައި ޕެއާސް ކާއިރު، އޭގެ ތޮށި ވެސް ކެއުން މުހިންމެވެ. ޕެއާސް އެކޭ އެއްގޮތަށް ގިނަ މޭވާތަކުގެ ތޮއްޓަކީ ވެސް ފައިދާ ހުރި މާއްދާތައް ގިނަ އެއްޗެކެވެ.
