ރާއްޖޭގައި ބަރުދަން އިތުރު މީހުން ވަރަށް ގިނައެވެ. ރާއްޖޭގެ އާބާދީގައި ހަށިގަނޑުގެ ބަރުދަން ހުންނަން ޖެހޭ މިންވަރަށްވުރެ 84 އިންސައްތަ މީހުން ބަރުކަމަށް ތަފާސްހިސާބުތަކުން ހާމަވެފައިވެއެވެ.
މިއީ ކަންބޮޑުވާން ޖެހޭ ކަމެކެވެ. މާބޮޑަށް ބަރުދަން އިތުރުވުމުގެ ސަބަބުން ގިނަ ބަޔަކު އެތައް ސިއްހީ މައްސަލައަކަށް ހުށަހެޅިގެންދެއެވެ.
އެންމެން އެ ބައްޔަކާމެދު ޖެހިލުންވާ، ކެންސަރު ފަދަ ބަލިތަކަށް ހުށަހެޅޭ ގިނަ ސަބަބުތަކުގެ ތެރެއިން އެއް ސަބަބަކީ ވެސް މާބޮޑަށް ފަލަވެ، ބަރުހެލިވުން ކަމުގައި ބައެއް ސިއްހީ ލިޔުންތަކުގައިވެއެވެ. ދުޅަހެޔޮ ސިއްހަތެއްގައި ހުރުމަށް މަގުފަހި ކުރުވާ އާދަތައް ދޫކޮށްލެވުމާއި، ކަސްރަތު ކުރުމަށް ވަގުތު ނުދެވުމާއި، ދުންފަތުގެ އިސްތިއުމާލު ކުރުމާއި، ދުފުން ފަދަ ކަންކަމަކީ ނުރައްްކާތެރި ބަލިތައް ޖެހުމަށް މަގުފަހި ކުރުވާ ބައެއް ކަންކަމެވެ.
ބަރުދަން ލުއިކޮށްލައި، ސިއްހީ މައްސަލަތަކުން މިންޖުވެ، އަމިއްލަ ނަފްސަށް އަލުން އިތުބާރު ހޯދަން ބޭނުންވާ މީހުންނަށް މި ކިޔައިދެނީ ސެޓިފައިޑް ޓްރެއިނަރ އަކަށްވެ، މިއަދު އެތައް ބަޔަކަށް އެހީވަމުން އަންނަ މަރިޔަމް ޝާއިގާގެ ވާހަކައެވެ. މިއީ ބަރުދަން ލުއި ކުރަން ބޭނުންވާ ކޮންމެ މީހަކަށް ވެސް ހާއްސަ ވާހަކައެކެވެ.
102 ކިލޯއިން 54 ކިލޯއަށް ބަރުދަން ލުއިކޮށްލައި، ހަށިގަނޑަށް ބޮޑު ބަދަލެއް
ޝާއިގާގެ ”ފިޓްނަސް ޖާނީ“ އިން ބަރުދަން ލުއިކޮށް، ހަށިގަނޑު ބަދަލުކޮށްލަން ބޭނުންވާ ކޮންމެ މީހަކަށް ވެސް އާ ހިތްވަރެއް ލިބޭނެކަން ޔަގީނެވެ.
މުޅި ދުނިޔެއާ ބައްދަލު ކުރި ކޮވިޑް-19ގެ ޕެންޑެމިކްގެ ތެރޭގައި ގޭގައި ބަންދުވެ އިންނަން ޖެހުމުން، ގިނަ މީހުންނެކޭ އެއްގޮތަށް ޝާއިގާގެ ހަށިގަނޑަށް ވެސް ބަދަލު އައިސް، ބަރުދަން އިތުރުވުމުގެ މައްސަލަ ދިމާވިއެވެ.
އޭނާގެ ބަރުދަން 102 ކިލޯއަށް އިތުރުވެ، އެންމެ ފަހުން ކުރިމަތިވީ ޑޮކްޓަރުގެ ބިރުވެރި އިންޒާރަކާއެވެ. ޑޮކްޓަރު ވިދާޅުވީ، މަދު ދުވަސްކޮޅެއްގެ ތެރޭގައި ބަރުދަން ލުއި ނުކޮށްފިނަމަ، ޝާއިގާގެ ކަކުލުގެ އޮޕަރޭޝަނެއް ކުރަން ޖެހޭނެ ކަމަށެވެ.
ހަށިގަނޑު ”ޓްރާންސްފޯމް“ ކުރުމަށް ޝާއިގާއަށް އެންމެ ބޮޑު ހިތްވަރެއް ލިބުނު ހިސާބަކީ މިއީއެވެ. އޭނާ ވަނީ ދެ ތިން މަސް ދުވަސް ތެރޭގައި، 102 ކިލޯއިން 68 ކިލޯއަށް ބަރުދަން ލުއިކޮށްފައެވެ.
ޑޮކްޓަރަށް ދައްކަންވާއިރަށް ހަށިގަނޑަށް އޭރު ގެނައި ބަދަލާއެކު، ކަކުލުގެ އޮޕަރޭޝަން ނުކޮށް އޭނާއަށް ސަލާމަތް ވެވުނެވެ.
ޝާއިގާ އޭގެ ފަހުން ވެސް ބަރުދަން 54 ކިލޯއަށް ލުއި ކުރިއެވެ. 68 ކިލޯ އިން 54 ކިލޯއަށް އޭނާ ލުއިކޮށްލީ، ދެ މަސް ދުވަހުންނެވެ. އޭގެ ފަހުން އެ ބަރުދަން ޝާއިގާ އަންނަނީ ދަމަހައްޓަމުންނެވެ.
މިއީ ދައްކަން ފަސޭހަ ވާހަކައަކަށް ވިޔަސް، ކުރަން ފަސޭހަ ކަމެއް ނޫނެވެ. ޝާއިގާ ބުނާގޮތުން ނަމަ، ނުގުޑާ ފަދަ އަޒުމެއް ބޭނުންވާ ކަމެކެވެ. ކާހިތްވާ އެތައް އެއްޗަކާ ދުރުގައި ހުންނަން ޖެހުމާއި، މުޅިން އާ ލައިފްސްޓައިލްއަކަށް ހޭނުމަކީ އޭނާއަށް ވެސް ފަސޭހަ ކަމަކަށް ނުވިއެވެ. ނަމަވެސް ހަށިގަނޑަށް ބަދަލު ގެންނާން ބޭނުންވެފައި ހުރި ވަރުން، އޭނާ ހުރީ ވަރަށް ވަރުގަދަ އަޒުމެއްގައެވެ.
ޝޭޕް އިޓް އަޕް ވުޖޫދަށް އައުން
ހިކެން ބޭނުންވާ ދިވެހި އަންހެނުންނަށް ހާއްސަކޮށްގެން، ޒޫމް އެޕް މެދުވެރިކޮށް ޝާއިގާ އޭނާގެ ރަށް އ.އ ބޮޑުފޮޅުދޫގައި ޕްރޮގްރާމެއް ހިންގާން ފެށީ، މި އަހަރުގެ ޖެނުއަރީ މަހުގައެވެ.
އޭނާ އާއި ދައްތަ، ފާތިމަތު ނާސިފާ ގުޅިގެން ހިންގާ ”ޝޭޕް އިޓް އަޕް“ ޕޭޖު މެދުވެރިކޮށް މިއަދު އަންނަނީ އެތައް ބަޔަކަށް އެހީވަމުންނެވެ. ދައްތަ އެހީވަނީ ޕޭޖުގައިވާ ޕޯޯސްޓުތައް ތައްޔާރު ކޮށްދީގެންނެވެ.
ކަސްރަތު ޕްރޮގްރާމާއި، މީލް ޕްލޭން ރާވަނީ ޝާއިގާއެވެ.
މަސް ދުވަހަށް ކުރިއަށް ގެންދާ މި އޮންލައިން ޕްރޮގްރާާމްގެ ފީ އަކީ، އެންމެ 350 ރުފިޔާއެވެ. މި ޕްރޮގްރާމްގެ ބައިވެރިންނަށް ކޮންމެ ވަގުތަކު ވެސް ޝާއިގާއާ ކޮންޓެކްޓު ކުރެވޭނެއެވެ. މިއީ 80 ޕަސެންޓު ޑައިޓު، އަދި 20 ޕަސެންޓު ކަސްރަތު ހިމެނޭ ޕްރޮގްރާމެކެވެ.
ކުޑަ އަގެއްގައި ހަށިގަނޑަށް އެދެވޭ ބަދަލު ގެނެވިދާނެ
ޝޭޕް އިޓް އަޕްގެ ބައިވެރިިިންނަށް ލިބޭ އެދެވޭ ނަތީޖާއާއިއެކު އެ ޕްރޮގްރާމަށް އޮންނަ ޑިމާންޑު ބޮޑު ވިޔަސް، ކުޑަ ފީއެއް ނަގައިގެން، މީހުންނަށް އެހީވުމުގެ މި މަސައްކަތް ކުރިއަށް ގެންދަނީ ކީއްވެގެންތޯ އަހާލުމުން ޝާއިގާ ބުނީ، މިކަމުން ލިބޭ އާމްދަނީއަށްވުރެ އޭނާއަށް ބޮޑު ހިތްހަމަޖެހުމެއް ލިބެނީ ކްލައިންޓުންނަށް ކަމެއް ކޮށްދެއްވި، އެދެވޭ ނަތީޖާތަކެއް ނެރެދެވޭތީ ކަމަށެވެ. އެކަމުން އޭނާއަށް ލިބޭ އުފާ މާ ބޮޑެވެ.
އެގޮތުން މާބަނޑު ނުވެގެން، ބަރުދަން ލުއި ކުރަން އަންނަ މީހުން ވެސް ޝޭޕް އިޓް އަޕްގެ ޕްރޮގްރާާމްގައި ބައިވެރިވުމުގެ ސަބަބުން އެތައް ދުވަހެއް ފަހުން ވެސް ބަލިވެއިނދެފައިވާކަން ޝާއިގާ ފާހަގަކުރިއެވެ.
”ބައެއް ކުދިން އެބަ ބުނޭ، 15 އަހަރު ފަހުންނޭ މި ކޮންސީވް ވީ. ވަރަށް އުފާވޭ، އެކަހަލަ ކޮމެންޓު ލިބުނީމަ.“ ޝާއިގާ ބުންޏެވެ.
މީގެ އިތުރުން ޕޮލިސިސްޓިކް އޯވަރިއަން ސިންޑްރޯމް(ޕީސީއޯއެސް) ހުންނަ މީހުންނަށް ވެސް، މި ކަސްރަތު ޕްރޮގްރާމްގެ ސަބަބުން، އެ ކޮންޑިޝަން އިން ސަލާމަތްވެވިފައިވެއެވެ. ބައެއް މީހުން ޕީީސީއޯއެސްގެ ޝިކާރައަކަށްވާ އެއް ސަބަބަކީ ބަރުދަން އިތުރުވުމެވެ.
ޝޭޕްއިޓްއަޕް ޕްރޮގްރާމްގައި ބައިވެރިވެ، ބަރުދަން ލުއި ކުރުމުން މާބަނޑުވި މީހެއްގެ ކޮމެންޓެއް-
މުޅި ރާއްޖޭގެ އެކި ކަންކޮޅުތަކުން އެތައް ބަޔަކު ޝޭޕް އިޓް އަފްގެ އޮންލައިން ޕްރޮގްރާމްގައި ދަނީ ބައިވެރިވަމުންނެވެ.
ޝާއިގާ ބުނީ، ކްލައިންޓުންގެ ޑައިޓް ޕްލޭން ކަނޑައަޅަނީ، ފަސޭހައިން ލިބޭނެ ކާތަކެތި ހިމަނައިގެން ކަމަށާއި، އެކި މަސައްކަތްތަކުގައި ބުރަކޮށް އުޅޭ މީހުންނަށް ވެސް ދެމެހެއްޓެނިވި ގޮތެއްގައި މިކަން ކުރެވޭނެ ގޮތަށް ކަމަށެވެ. އެގޮތުން އޭނާ ބަރުދަން ލުއިކުރިއިރު، ކެއުން ގެންގުޅުނު ގޮތަށް މީލް ޕްލޭން ހަދައިދޭ ކަމަށް ޝާއިގާ ކިޔާދިނެވެ.
ޝާއިގާގެ ކްލައިންޓެއް، ފަސް މަސް ދުވަހުން ހޯދި ނަތީޖާ
ޝާއިގާގެ ކްލައިންޓުން ތިބީ ނަތީޖާ ފެނި، އުފަލުން
ޝާއިގާމެން ހިންގާ މި ޕްރޮގްރާމެއްގެ ބައިވެރިން ތިބީ، ބަރުދަން ލުއިވެ، މިންހެޔޮކޮށް ކެއުމަށާއި، ކަސްރަތުގެ ދުނިޔެއަށް ފަރިތަކޮށްދޭ މި ޕްރޮގްރާމްގެ ނަތީޖާއާމެދު ވަރަށް ބޮޑަށް ހިތްހަމަޖެހިގެންކަން އެނގެނީ، އެ ކްލައިންޓުންދޭ ”ފީޑްބެކް“ އިންނެވެ.
ޝާއިގާގެ ކްލައިންޓެއްގެ ފީޑްބެކް
ޝާއިގާގެ ކްލައިންޓެއްގެ ފީޑްބެކް
ޝާއިގާގެ ކްލައިންޓެއްގެ ފީޑްބެކް
ޝާއިގާގެ މެސެޖެއް
ދުޅަހެޔޮ ސިއްހަތެއްގައި ހުރުމުގެ މުހިންމުކަން ބޮޑުއިރު، ދިވެހީންގެ ކިބައިގައިވާ އެކަމަށް ހުރަސް އަޅާ އާދަތަކާ ދުރުވާން ޖެހޭ ކަމަށް ޝާއިގާ ބުނެއެވެ.
ރައްޓެހިންނާއެކު ކޮފީތަކަށް ގޮސް ކެއުމާއި، ބޭރުން އޯޑަރުކޮށްގެން ކެއުން ފަދަ އާދަތަކާ ދުރުވުމަށް އޭނާ ނަސޭހަތް ދިނެވެ.
ބަރުދަން ލުއިކޮޮށް، ސިއްހީ ގޮތުން ފައިދާ ހުރި ކާނާ ކެއުމަކީ މުހިންމުކަމެއްކަން ގަބޫލުކޮށް އެކަން ހާސިލު ކުރަން ބޭނުންވާ މީހުންނަށް ޝާއިގާ އެ ދަނީ އެހީވަމުންނެވެ.
ޝޭޕްއިޓްއަޕް ޕްރޮގްރާމްގައި ބައިވެރިވުމަށް 9711377 ނުވަތަ 9893381އަށް ގުޅައިގެން ކުރިއަށް ގެންދާށެވެ. ނޫންނަމަ، މި ޕޭޖަށް މެސެޖު ކޮށްލާށެވެ.
