ނޭޕާލުގައި ހިނގި ފެންބޮޑުވުމުގެ ހާދިސާތަކުގައި ގިނަ ބަޔަކު މަރުވުމާ ގުޅިގެން، ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެ ގައުމުގެ ބޮޑުވަޒީރު، ކޭޕީ ޝަރުމާ އޯލީއަށް ހަމްދަރުދީގެ މެސެޖެއް ފޮނުއްވައިފިއެވެ.
ސޯޝަލްމީޑިއާގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، ނޭޕާލްގައި ފެންބޮޑުވެ، ބިންގަނޑު ކަނޑައިގެން ދިޔުމުގެ ހާދިސާތަކެއް ހިނގައި ދިޔުމަކީ އެކަމާ ހިތާމަ ކުރައްވާ ކަމެއް ކަމަށެވެ.
އަދި ބޮޑުވަޒީރު ކޭޕީ ޝަރުމާއަށާއި، ހާދިސާގައި ގެއްލުން ލިބުނު އާއިލާތަކާއެކު އެމަނިކުފާނުގެ ހަމްދަރުދީވާކަން ފާހަގަކުރެއްވިއެވެ.
މި ހާދިސާތަކުގައި އަނިޔާ ލިބުނު މީހުންނަށް އަވަސް ޝިފާއެއް ލިބި، ގެއްލިގެން ދިޔަ މީހުން އަވަހަށް ފެނުމަށް އުއްމީދު ކުރައްވާ ކަމަށް ވެސް ރައީސް ވިދާޅުވިއެވެ.
މި ދަނޑިވަޅުގައި ނޭޕާލްގެ އަވަށްޓެރި، އަދި ރަހުމަތްތެރިޔާ، ރާއްޖެ ވަނީ އެ ގައުމާއެކުގައި ކަމަށް ވެސް ރައީސް މުއިއްޒު ވިދާޅުވިއެވެ.
ނޭޕާލަށް ކުރަމުންދާ ވިއްސާރައިގައި ހިނގަމުންދާ ފެންބޮޑުވުމުގެ ހާދިސާތަކުގައި، 150އަށްވުރެ ގިނަ މީހުން ވަނީ މަރުވެފައެވެ.
ބޭރުގެ މީޑިއާތަކުން ބުނާ ގޮތުގައި، މި ހާދިސާތަކުގައި 50އަށް ވުރެ ގިނަ މީހުން ގެއްލިފައިވެއެވެ. ކަމާބެހޭ ފަރާތްތަކުން ދަނީ ގެއްލުނު މީހުން ހޯދުމުގެ މަސައްކަތް ކުރަމުންނެވެ.
