ބަނޑު ހަރުވުން ނުވަތަ ބަނޑު ހިކުމަކީ ވަރަށް ގިނަ ބަޔަކަށް ދިމާވާ ވަރަށް ވޭން ހުރި ކަމެކެވެ. ބަނޑު ހިކުމުގެ ސަބަބުން ބޮޑު ކަމުދާން އުނދަގޫވެ އެތައް އުނދަގުލެއް ކުރިމަތިވެއެވެ.
ތުއްތު ކުދިންގެ ތެރެއިން ދަޅުކިރާއި އެކުގައި މަންމަގެ ގާތުން ދޭ ކުދިންގެ ބަނޑު ހަރުވުމުގެ ފުރުސަތު ބޮޑެވެ.
ކަންމިހެން ހުރުމާއެކު ވެސް، ހަމައެކަނި ގާތުންދޭ ކުއްޖަކު ބޮޑު ކަމުނުގޮސް ދެތިން ދުވަސްވުން އެކަށީގެން ވެއެވެ.
މުހިންމީ ބޮޑު ކަމުދާ އަދަދަށްވުރެ، ބޮޑުކަމު ދިއުމުގައި އެއްވެސް ދަތިކަމަކާނުލާ ބޮޑުކަމުދިއުމާއި ބޮޑު ކަމުދާތަކެތި މަޑުކޮށް ހުރުމެވެ.
ތުއްތު ކުދިންގެ ބޮޑުކަމުދިއުމުގެ އާދަޔަށް ބޮޑެތި ބަދަލުތަކެއް އަންނަނީ ކާންދޭން ފެށުމުންނާއި، ނެޕީގެ އާދަ ކަނޑުވާލަން މަސައްކަތްކުރަމުން އަންނަ ދުވަސްވަރުއެވެ.
މާހައުލު ބަދަލުވުމާއި، ސްކޫލަށް ދާންފެށުމާއި ނަފުސާނީ ބައެއް މައްސަލަތަކަކީ ވެސް ބޮޑުކަމުދިއުމުގެ އާދައަށް ބަދަލު އަތުވެދާނެ މަރުހަލާތަކެކެވެ.
މި މަރުހަލާތަކަކީ އެކުދިންނަށް ބެލެނިވެރިންގެ ފަރާތުން އިތުރު އަޅާލުމާއި ލޯތްބާއި އެހީތެރިކަން ބޭނުންވާނެ މަރުހަލާތަކެކެވެ.
އެކުދިން ތަހައްމަލް ކުރަމުންދާ އުނދަގޫތައް ފާހަގަކޮށް، އޯގާތެރިކަމާ އެކު ހިތްވަރުދެއްވުން ވަރަށް މުހިންމު ދުވަސްވަރެކެވެ.
ތުއްތު ކުދިންނަށް ބަނޑު ހިކުމުގެ މައްސަލަ ދިމާވާ ސަބަބުތަކުގެ ތެރޭގައި އެ ކުދިންނަށް ޕްރޮސެސްކޮށްފައި ހުންނަ ކާއެއްޗެހި މާ ގިނައިން ދެވުން ހިމެނެއެވެ.
ފޮއްޓެއް ނޫނީ ޕެކެޓުތަކުގައި ބަންދުކޮށްފައި ހުންނަ ކެއުންތައް ކުޑަ ކުދިން ކާހިތް ވިޔަސް، މިއީ ސިއްހީ ފައިދާތައް އެކުލެވިގެން ނުވާ ކެއުންތަކެވެ.
ބަނޑު ހިކުމުގެ މައްސަލައިގެ ހައްލަށް ”ޕީ“ އަކުރުން ފެށޭ މޭވާތައް ކުދިންނަށް ދިނުމަށް ސިއްހީ މާހިރުން ލަފާ ދެއްވައެވެ. އެގޮތުން ޕެއާސް، ޕަޕާޔާ، ޕްރޫން، ޕައިންއެޕަލް އަދި ޕްލަމް އަކީ ވެސް ބަނޑު ހިކުމުން ދުރުކޮށްދޭ މޭވާތަކެވެ.
މީގެ އިތުރުން ކަރާ، އަދި ވަރަށް ބޮޑަށް ދޮންވެފައި ހުންނަ ދޮންކެޔޮ ވެސް ދެވިދާނެއެވެ.
ތުއްތު ކުދިން ބަނޑު ހިކެން މެދުވެރިވާ ސަބަބުތަކުގެ ތެރޭގައި، ހަށިގަނޑުން ފެން މަދުވުން ވެސް ހިމެނެއެވެ. އެހެންވެ، ރަނގަޅަށް ފެން ނުވަތަ ޖޫސް ފަދަ ދިޔާ ތަކެތި ދިނުމަށް ވެސް ސަމާލުކަން ދޭން ޖެހެއެވެ.
