ރައްޔިތުންގެ މަޖިލީހުގެ ޖަލްސާތަކުގައި ރިޔާސަތުން، މަޖިލީހުގެ ރައީސް މުހައްމަދު ނަޝީދު، ކޮންމެ ދުވަހަކު 11 ޖެހުމަށް ފަހުގައި ”ގެއްލޭ“ ކަމަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެެއެވެ.
ހޯމަ ދުވަހު ރައްޔިތުންގެ މަޖިލީހުގެ ޖަލްސާ ފެށުނުއިރު، ޖަލްސާއަށް ހާޒިރުވެވަޑައިގެން ތިއްބެވީ 87 މެމްބަރުންގެ ތެރެއިން، އެންމެ 24 މެމްބަރުންނެވެ. މަޖިލީހުގެ ޖަލްސާ އޮންނަނީ ހޯމަ، އަންގާރަ އަދި ބުދަ ދުވަހުއެވެ.
އެދުވަހުގެ ޖަލްސާގައި، ރައީސް ނަޝީދު މިކަމާ ކަންބޮޑުވުންފާޅުކުރައްވައި ވިދާޅުވީ ގަވާއިދުން މުސާރަ ލިބެމުން އަންނަ ތަނެއްގައި، ހެނދުނު ޖަލްސާ ފަށާއިރު، އެންމެ 24 މެމްބަރުން ހާޒިރުވެ ތިއްބެވުމުން، އެކަމުން އެނގިގެންދަނީ މެމްބަރުންނަށް ގާނޫނީ ޒިންމާ އަދާނުކުރެއްވޭކަން ކަމުގައެވެ.
ޗެނަލް13އިން ގެނެސްދިން ”ނިއުސްޓޯކް“ ޕްރޮގްރާމްގައި، މިކަމާ ގުޅޭގޮތުން ވާހަކަ ދައްކަވަމުން، އިދިކޮޅު ޕީޕީއެމްގެ ނައިބު ރައީސްކަންވެސް ކުރައްވާ ޝިޔާމް ވިދާޅުވެފައިވަނީ މަޖިލީހުގެ ހާޒިރީ ދަށް ވާހަކަ ރައީސް ނަޝީދު ދައްކަވާއިރު، އެތަނުގެ 65 މެމްބަރުންނަކީ އެމްޑީޕީގެ މެމްބަރުން ކަމަށެވެ.
އަދި މަޖިލީހުގެ ރައީސްވެސް، ކޮންމެ ދުވަހަކު 11ގެ ފަހުން، ރިޔާސަތު ދޫކުރައްވައި ވަޑައިގަންނަވާ ކަަމަށް އޭނާ ވިދާޅުވިއެވެ. ނަޝީދަކީ މަޖިލީހުގެ އެއްވެސް ކޮމެޓީއެއްގައިވެސް އިންނަވާ ބޭފުޅަަކަށް ނުވާއިރު، 11 ޖަހާއިރަށް ނަޝީދު ރިޔާސަތު ދޫކުރައްވައި ވަޑައިގަންނަވާތީ ޝިޔާމް ފާޑުވިދާޅުވިއެވެ.
”ކޮންމެ ދުވަހަކު 11 ޖެހުމަށް ފަހަކު، އަޅުގަނޑުމެންނަކަށް ނުފެނޭ ރައީސް ނަޝީދެއް. އެހެންވީމަ، މީގަ މިސާލު ދައްކަވަން ހުންނެވި ބޭފުޅަކީ ރައްޔިތުންގެ މަޖިލީހުގެ ރައީސް ނަޝީދު ކަމަށް ވަންޏާ، ރައީސް ނަޝީދު އެބަޖެހޭ އެކަންކަން ރަނގަޅު ކުރައްވަން.“ ޝިޔާމް ވިދާޅުވިއެވެ.
ޝިޔާމް އިތުރަށް ވިދާޅުވީ އެމްޑީޕީއަށް މަޖިލީހުގެ ސުޕަރ މެޖޯރިޓީ ލިބުމުން، މަޖިލިސް ތަފާތުވާނެ ކަމަށް ބުނަމުންދިޔައިރު، ތަފާތު ވަނީ މިފަދަ ކަންތައްތަކުން ކަމަށެވެ. އަދި ސަރުކާރުން މަޖިލީހަށް ފޮނުވަން ޖެހޭ ބިލުތައް ނުފޮނުވުން ފަދަ ސަބަބުތަކާ ހެދި އެމްޑީޕީގެ ސުޕަރ މެޖޯރިޓީއަށް ކަންކަން ނުކުރެވޭ ކަމަށްވެސް އޭނާ ވިދާޅުވިއެވެ.
