ރައީސް އިބްރާހީމް މުހައްމަދު ސޯލިހުގެ ސަރުކާރުން ވެފައިވާ ވައުދުތަކުގެ 99 އިންސައްތަ ފުއްދިފައިވާނަމަ، ހަތަރު އަހަރުން ވެރިކަމުގެ ދައުރު ނިންމަވާލައްވަން ވީނޫންތޯ، ރައީސް ޔާމީން އަބްދުލްގައްޔޫމް ސުވާލު ކުރައްވައިފިއެވެ.
ދ.ކުޑަހުވަދޫގައި މިރޭ ބޭއްވި ޖަލްސާގައި، އެރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ޔާމީން ވަނީ ސަރުކާރަށް ތައުރީފު ކުރައްވައި، ރައްޔިތުންގެ މަޖިލީހުގައި މާމިގިލި ދާއިރާގެ މެމްބަރު ގާސިމް އިބްރާހީމް ދެއްކެވި ވާހަަކައަށް ފާޑުވިދާޅުވެފައެވެ.
ކޯލިޝަންގެ ބައިވެރިޔާ، ޖުމްހޫރީ ޕާޓީ(ޖޭޕީ)ގެ ލީޑަރު ގާސިމް ވަނީ މި ސަރުކާރުގެ ވައުދުތަކުގެ 99 އިންސައްތަ ފުއްދާފައިވާ ކަމަށް ވިދާޅުވެފައެވެ.
މިވާހަކައަށް ފާޑުވިދާޅުވެ، މިރޭގެ ޖަލްސާގައި ރައީސް ޔާމީން ވަނީ ވައުދުތައް ފުދިފައިވާނަމަ، ވެރިކަމުގެ ދައުރު ނިންމަވާލެއްވުމަށް ގޮވާލައްވައިފައެވެ.
”99 ޕަސެންޓް މިހާރު ނިމިއްޖޭ، އެހެންވީމަ، ރައީސް ސޯލިހު ވެވަޑައިގެންނެވި ވައުދަށް، ރިޔާސީ ދައުރު ހަތަރު އަހަރުން ނިންމަވާލަން ވީނުންތޯ؟ ހަތަރު އަހަރުން ނިންމާލީމަ ފުދެއެއް ނޫންތޯ؟ މިއީ އަޅުގަނޑުމެންގެ ސިޔާސީ ލީޑަރުން ނުކުމެ ރައްޔިތުންނަށް އޮޅުވާލާ މިންވަރު.“
ޕްރޮގްރެސިވް ކޮންގްރެސް ކޯލިޝަނުގެ ރިޔާސީ ކެންޑިޑޭޓް، ރައީސް ޔާމީން ވަނީ ޕީޕީއެމްގެ މެނިފެސްޓޯއާ ގުޅޭގޮތުންވެސް ވާހަކަފުޅު ދައްކަވާފައެވެ. އެގޮތުން ޕީޕީއެމްގެ މެނިފެސްޓޯގައި އެންމެ ކުރީގައި އޮތީ ޒުވާނުންކަން މިރޭވެސް ތަކުރާރު ކުރެއްވިއެވެ.
ޕީޕީއެމްގެ ވެރިކަމެއްގައި އެންމެ އިސްކަމެއް ދޭނީ، ޒުވާނުންނަށް ބޭނުންވާ ކަންކަން ފަހިކޮށްދިނުމަށް ކަމަށާއި، އެއީ ގެދޮރުވެރިކަމާއި، ޝަރަފުވެރި ދިރިއުޅުމެއް އުޅެވޭވަރުގެ ވަޒީފާތައް ހަމަޖެއްސުން ކަމަށް އެމަނިކުފާނު ވިދާޅުވިއެވެ.
ރާއްޖޭގެ އާބާދީގެ ބޮޑު ބަޔަކީ ޒުވާނުންކަން ފާހަގަކުރައްވައި ރައީސް ޔާމީން ވިދާޅުވީ 2018 ވަަނަ އަހަރުން ފެށިގެން 2023 ވަނަ އަހަރަށް، އަލަށް ވޯޓު ލާ އުމުރުގެ 47،000 ޒުވާނުން އެބަތިބި ކަމަށާއި، މިކަމުންވެސް އެނގިގެން ދަނީ، ޒުވާނުންގެ ބޭނުންތައް ފުއްދައިދޭން ސަރުކާރުތަކުން އިސްކަން ދޭން ޖެހޭ މިންވަރު ކަމަށް ވިދާޅުވިއެވެ.
