ދިވެހީން މުއްސަނދި ނުވެގެން އުޅެނީ ޖުވާ ކުޅޭ ތަންތަން ނުހިންގިގެން ނޫން ކަމަށް އެމްޑީޕީގެ ކުރީގެ ނައިބު ރައީސް އަލްހާން ފަހުމީ ވިދާޅުވެއްޖެއެވެ.

Ads by Asuru

އަލްހާން މިހެން ވިދާޅުވެފައިވަނީ ރާއްޖޭގައި ކެސީނޯ ހިންގުމާ ގުޅޭ ގޮތުން ރައީސް މުހައްމަދު ނަޝީދު ދެއްކެވި ވާހަކަފުޅަށް ރައްދު ދެއްވައި، މިއަދު ކުރެއްވި ޓްވީޓެއްގައެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ރައީސް މުހައްމަދު ނަޝީދު ވަނީ، ރާއްޖޭގައި ކެސިނޯ އެޅުމަކީ މަނާކަމެއް ނޫން ކަމަށް ވިދާޅުވެފައެވެ.

މިއަދު އޮތް ރައްޔިތުންގެ މަޖިލީހުގެ ޖަލްސާގައި ކާށިދޫ ދާއިރާގެ މެމްބަރު ޖާބިރު ޔޫތު މިނިސްޓަރު އަހްމަދު މަހުލޫފް އާއި ކުރެއްވި ސުވާލަކަށް ޖަވާބު ދެއްވަމުން ރައީސް ނަޝީދު ވިދާޅުވީ ކެސިނޯ ލައިސަންސް ދިނުމާއި ގުޅޭގޮތުން ތަކުރާރުކޮށް ގިނަ ސުވާލުތައް އަންނަ ކަމަށާއި ނަމަވެސް ކެސިނޯ ލައިސަންސް ދިނުމަކީ އެއްވެސް ގަވާއިދަކުން މަނާކުރާ ކަމެއް ނޫން ކަމަށެވެ.

ޖާބިރު ވިދާޅުވީ ރާއްޖޭގައި އޮތީ ވަރަށް ހައި ކްލާސް ޓޫރިޒަމެއް ކަމަށާއި ފައިދާ ނުވާގޮތަށް ސްޕޯޓްސް ޓޫރިޒަމް ހިންގުމުގެ ބަދަލުގައި ކެސިނޯތައް ހިންގުމަކީ ބޭނުންތެރި ކަމެއް ކަމަށެވެ. އަދި އެކަމަށް ހުއްދަ ނުދެވިގެން އުޅެނީ ކީއްވެގެންތޯ އޭނާ ވަނީ އައްސަވާފައެވެ.

ޖަވާބުގައި މަހްލޫފް ވިދާޅުވީ މިހާރުވެސް ރިސޯޓްތަކުގައި ބަނގުރާ ވިއްކާ ކަމަށާއި، ނަމަވެސް ކެސިނޯގެ ވާހަކަ ދެއްކުމަކީ ހަރާމްކަމެއް ކަމަށް ބުނާ ކަމަށެވެ. މަހުލޫފު ވަނީ، މިކަމުގައި ޖެހޭނީ މަޝްވަރާ ކުރަން ކަމަށް ވިދާޅުވެފައެވެ.