މާތް ރަސްކަލާނގެ، އެކަލާނގެ ހެއްދެވި އަޅުތަކުން ދެކެ ނުހަނު ލޯބިވެވޮޑިގެންވެއެވެ. އަަހަރުމެން އަބަދުވެސް އަޑު އަހަނީ، މައިވަންތަކަމުގެ ކުލުނުގެ ވާހަަކައެވެ. މަންމައަކު ދަރިއެއް ދެކެވާ މަތިވެރި ލޯބީގެ ވާހަކައެވެ.
ޝެއިޚް އާސިމް އަލްް ހަކީމާ ސުވާލު ކުރެވުނެވެ. މާތް ﷲ އެކަލާނގެ އަޅުތަކުން ދެކެ ލޯބިވެވޮޑިގެންވަނީ ކިހާވަރަކަށް ހެއްޔެވެ؟ މައިންބަފައިން އަހަރުމެންދެކެ ވާ ލޯތްބަށްވުރެ، 70 ގުނަ އިތުރަށް އެކަލާނގެ އަހަރުމެން ދެކެ ލޯބިވެވޮޑިގެންވޭތޯއެވެ؟ އެފަދަ ހަދީޘެއް އޮވޭތޯއެވެ؟
ޝެއިޚް ޖަވާބުގައި ވިދާޅުވެފައިވަނީ، މާތްﷲގެ ސިފަފުޅުތައް، އެކަލާނގެ އަޅުތަކުންނަށް އަންގަވާފައިވާއިރު، އެކަލާނގެއީ، ތައުބާވާ، އެހެން މީހުންނަށް މާފު ކުރާ، އަދި މިނޫންވެސް އެތަައް ރަނގަޅު ސިފަތަކެއް ލިބިފައިވާ އަޅުން ދެކެ އިންތިހާއަށް ލޯބިވެވޮޑިގަންނަވާ ފަރާތްކަން އަންގަވާފައިވާ ކަމަށެވެ. އަދި ހަމައެއާއެކު، އެކަލާނގެއީ، ނުބައި އަމަލުތައް ކުރާ މީހުން ދެކެ ކޯފާވެވޮޑިގަންނަވާ އަޒާބު ފޮނުއްވާ ރަސްކަލާނގެ ކަމަށްވެސް ޝެއިޚް ވިދާޅުވިއެވެ.
މައިންބަފައިންނާއި ޢާއިލާގެ އިތުރުން މުޅި މުޖުތަމައު މީހަކު ދެކެ ރުޅި އައިސް، ނަފްރަތުކޮށް، ބާކީކޮށް ދޫކޮށްލި ނަމަވެސް ﷲ ތަޢާލާ އެމީހަކު ދޫކޮށެއް ނުލައްވަވައެވެ. ﷲ ތަޢާލާ އެދިވޮޑިގަންނަވަނީ ތައުބާވުމަށެވެ. ﷲ ތަޢާލާގެ މަގަށް ރުޖޫޢަވުމަށެވެ. ކިތަންމެ ގިނަ ފާފަތަކެއް ކުރެވިފައިވީ ނަމަވެސް ﷲ ތަޢާލާގެ މަގަށް އެނބުރި ރުޖޫޢަވުމުން އެމީހެއްގެ ފާފަތައް ފުއްސަވައި ދެއްވަވަތެވެ.
މިކަމުން އެނގިގެންދަނީ ﷲ ތަޢާލާ، އެކަލާނގެ އަޅުތަކުން ދެކެ ލޯބިފުޅުވެވޮޑިގަންނަވާ މިންވަރެވެ. ނަމަވެސް މައްސަލައަކީ ތައުބާވެ ﷲ ތަޢާލާގެ މަގަށް ރުޖޫޢަވުމަށް އަހަރެމެންނަށް އެއްވެސް މަސައްކަތެއް ނުކުރެވޭ ކަމެވެ. ޣާފިލުވެގެން ތިބެވޭކަމެވެ.
ޝެއިޚް ވަނީ މާތްﷲ ލޯބިވެވޮޑިގަންނަވާ ގޮތާއި، އަހަރުމެން އިންސާނުން ލޯބިވެވޮޑިގަންނަވާ ގޮތް ތަފާތުވާނެކަން ހަނދުމަކޮށްދެއްވާފައެވެ. އަދި އެކަލާނގެ ކޯފާވެވޮޑިގަންނަވާ ގޮތްވެސް ތަފާތުވާނެ ކަަމަށް ވިދާޅުވިއެވެ. އޭނާ ވިދާޅުވީ މާތްﷲގެ އެއްވެސް ސިފަ ފުޅެއް، އެކަލާނގެ ހެއްދެވި އެއްވެސް އެއްޗަކާ ވައްތަރުވެގެން ނުވާ ކަމަށެވެ.
ޝެއިޚް އިތުރަށް ވިދާޅުވީ، މާތްﷲގެ އެއްވެސް ސިފަފުޅެއް، އެއްވެސް މަހްލޫގަކާ އެއްގޮތް ވެގެން ނުވާއިރު، އެކަލާނގެ އިންސާނުން ދެކެ، މައިން ލޯބިވާ މިންވަރަށްވުރެ 70 ގުނަ އިތުރަށް ލޯބިވެވޮޑިގަންނަވާ ކަމަށް ބަޔާންކުރައްވާފައިވާ ސައްހަ ހަދީޘެއް ނުވާ ކަމުގައެވެ.
