މާތްވެގެންވާ އިސްލާމްދީނަށްް ޣައްދާރުވެއްޖެ ބަޔަކު، އެބައެއްގެ އަނބިދަރީންނާއި ގައުމު ވިއްކާލަންވެސް، ފަހަތަށް ނުޖެހޭނެ ކަމުގައި ޝެއިޚް އާދަމް ނިޝާން ވިދާޅުވެއްޖެއެވެ.
ޝެއިޚު ނިޝާން މިފަދައިން ވިދާޅުވެފައިވަނީ ޗާގޯސް އައިލެންޑް ނުވަތަ ފޯޅަވަހީގެ މައްސަލައިގައި ދިވެހި ސަރުކާރުން ކުއްލި ގޮތަކަށް ސްޓޭންޑް ބަދަލު ކުރި ކުރުމަށް އިޝާރާތް ކުރައްވައި، މީސްމީޑިއާގައި ކުރެއްވި ޕޯސްޓެއްގައެވެ.
އޭނާ ވިދާޅުވީ މާތް ރަސްކަލާނގެ އާއި، އެކަލާނގެ ރަސޫލާއަށް ހިޔާނާތްތެރިވެ، އިސްލާމްދީނަށް ޣައްދާރު ވެއްޖެ ބަޔަކު، ތިމާގެ އަމިއްލަ މައިންބަފައިންނާއި، އަނބިދަރިންނާއި، ގައުމު ވިއްކާލަންވެސް ފަހަކަށް ނުޖެހޭނެ ކަަމަށެވެ.
ޝެއިޚު ވަނީ ޗާގޯސްގެ މައްސަލައިގައި ސަރުކާރުން އަމަލު ކުރާ ގޮތަށް ފާޑުވިދާޅުވެ، ކުރީގެ ބަންޑާރަ ނައިބު، ޑރ.މުހައްމަދު މުނައްވަރު ދެއްކެވި ވާހަކައެއްވެސް ހިއްސާ ކުރައްވާފައެވެ.
ޑރ.މުނައްވަރު އިއްޔެ ބޭއްވެވި ނޫސްވެރިންގެ ބައްދަލުވުމެއްގައި ވިދާޅުވެފައިވަނީ، ޗާގޯސް އައިލެންޑްސްއަކީ މޮރީޝަސްގެ ސިޔާދަތުގެ ތެރޭގައި ހިމެނޭ ސަރަހައްދެއް ކަމަށް ރާއްޖެއިން ގަބޫލުކޮށް އަމަލުކުރި ގޮތުން ސަރުކާރަށް ތަންދޮރު ނޭނގޭކަމަށް ވަރަށް ބޮޑަށް ބުރަވެވޭ ކަމަށެވެ.
ޗާގޯސް އައިލެންޑްސްއަކީ މޮރީޝަސްގެ ސިޔާދަތުގެ ތެރޭގައި ހިމެނޭ ގައުމެއް ނޫން ކަމަށް ބައިނަލްއަގުވާމީ ކޯޓެއްގައި ރާއްޖެއިން ވަކާލާތު ކުރަމުން ދަނިކޮށް އެއާ ދިމާ އިދިކޮޅަށް ޗާގޯސް އައިލެންޑްސް އަކީ މޮރީޝަސްގެ ބައެއް ކަމަށް ގަބޫލުކޮށް އެ ގައުމުގެ ބޮޑުވަޒީރަށް ސިޓީ ފޮނުވުމުމަކީ ހައިރާން ވާވަރުގެ ކަމެއް ކަމަށް މުނައްވަރު ވިދާޅުވިއެވެ.
