އީރާނާ ދެކޮޅަށް ކުރަމުންދާ އަސްކަރީ އޮޕަރޭޝަންތައް ވަރަށް އަވަހަށް ނިމުމަކަށް އަތުވެދާނެ ކަމުގެ އިޝާރާތެއް އެމެރިކާގެ ރައީސް ޑޮނަލްޑް ޓްރަމްޕް ދީފިއެވެ. ޓްރަމްޕް ބުނި ގޮތުގައި މި ހަނގުރާމަ މިހާރު އޮތީ ގާތްގަނޑަކަށް ނިމުމަކާ ހަމައަށް އައިސްފައެވެ.

ބީ.ބީ.ސީގެ އެމެރިކާގެ ޕާޓްނަރު ކަމަށްވާ ސީ.ބީ.އެސް ނިއުސްއަށް ދެއްވި ބަސްދީގަތުމެއްގައި ޓްރަމްޕް ބުނި ގޮތުގައި މި ހަނގުރާމަ މިހާރު އޮތީ ގާތްގަނޑަކަށް ނިމުމަކާ ހަމައަށް އައިސްފައެވެ. މީގެ ކުރިން އޭނާ ބުނެފައި ވަނީ، މި ހަނގުރާމަ އެތައް ހަފުތާއަކަށް ދެމިގެން ހިނގައިދާނެ ކަމަށެވެ. ނަމަވެސް ފަހުން ބުނީ އެމެރިކާއިން އޮތީ މި ހަނގުރާމައިގެ ތާވަލަށް ވުރެ މާ ކުރީގައި ކަމަށެވެ.

ތުރުކީވިލާތް، ޔޫ.އޭ.އީ އަދި ގަތަރުން ވަނީ އީރާނުން ފޮނުވާލި މިސައިލްތަކެއް ހުއްޓުވާފައިވާ ކަމަށް ބުނެފައެވެ. ހަމައެއާއެކު، އިތުރު ހަމަލާތަކެއް އިރާނުން ދެމުންދާކަން ފާހަގަކުރެވިފައިވާ ކަމަށް އިސްރާއީލުން ބުނެއެވެ.

މެދުއިރުމަތީގައި ހިނގަމުންދާ މި ހަނގުރާމައިގެ ސަބަބުން ތަކެތީގެ އަގު އުފުލި، އިންފްލޭޝަނަށް ބާރުބޮޑުވެދާނެ ކަމަށް އިނގިރޭސިވިލާތުގެ ޗާންސެލަރ ރޭޗަލް ރީވްސް ވަނީ ވިދާޅުވެފައެވެ. ޖީ-7 ގެ މާލީ ވަޒީރުންނާއެކު ބޭއްވި ބައްދަލުވުމަކަށްފަހު އޭނާ މިހެން ވިދާޅުވިއިރު، 2022 ވަނަ އަހަރަށްފަހު ފުރަތަމަ ފަހަރަށް ދުނިޔޭގެ ބާޒާރުގައި ސައިޕްރަސް ތެލުގެ އަގު ހޯމަ ދުވަހު ވަނީ ފީފާއެއް 100 ޑޮލަރަށްވުރެ މައްޗަށް އަރާފައެވެ.

އިނގިރޭސި ދިފާއީ ވަޒީރު ޖޯން ހީލީ ވިދާޅުވި ގޮތުގައި، މިދިޔަ ހަފުތާގައި ސައިޕްރަސްގައި ހުންނަ އިނގިރޭސި އަސްކަރީ މަރުކަޒަކަށް ދިން ޑްރޯން ހަމަލާއަކީ ލުބުނާން ނުވަތަ އިރާގުން ފޮނުވާލި ހަމަލާއެކެވެ.

އިސްރާއީލުން އީރާނުގެ ތިން ސަރަހައްދަކަށް ހަމަލާ ދެމުންދާ ކަމަށާއި، ލުބުނާނަށްވެސް ހަމަލާތައް އަމާޒުކުރަމުންދާ ކަމަށް ވަނީ ބުނެފައެވެ.

އީރާނުން ފޮނުވާ މިސައިލްތަކަކާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ހިޔާވަހިކަން ހޯދުމަށް އިސްރާއީލުން އަނެއްކާވެސް ވަނީ އާންމުންނަށް އަންގާފައެވެ. މިއަދުގެ އެކި ވަގުތުތަކުގައި މިފަދަ އެތައް އެންގުންތަކެއް ނެރެފައިވީ ނަމަވެސް، މިހާތަނަށް ބޮޑު ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ.