ބ. ހިތާދޫ އަށް ނިސްބަތްވާ ހާއްސަ އެހީ އަށް ބޭނުންވާ، އުމުރުން 19 އަހަރުގެ ފައްޔާހް ހަސަން ފަޔާޒް (ދޮންކަލޯ) ބޯހިޔާވަހިކަމެއް ހޯދަން އެހީ ހޯދުމަށް ޓިކްޓޮކްގައި ކުރިއަށް ގެންދިޔަ ލައިވް އަށް ދިވެހި ރައްޔިތުންގެ ފަރާތުން ހޫނު ތަރުހީބެއް ލިބިއްޖެއެވެ.
އެގޮތުން މި ލައިވް މެދުވެރިކޮށް 1.2 މިލިއަން ރުފިޔާ ދިވެހިން ވަނީ ދޮންކަލޯއަށް ހަދިޔާ ކޮށްފައެވެ.
ޓިކްޓޮކްގެ ދިވެހި ކޮމިއުނިޓީން ރޭ ކުރި އަށް ގެންދިޔަ ލައިވް އަކީ ދޮންކަަލޯއަށްޓަކައި އޭނާގެ ބައްޕަ ފައްޔާޒު ހަސަން އިމާރާތް ކުރަން ފަަށައި ނުނިމި ހުރި ގެ ނިންމަން ފަންޑު ހޯދަން ކުރިއަށް ގެންދިޔަ ލައިވެވެ.
”ހިޔާ ފޯ ދޮންކަލޯ“ ގެ ނަމުގައި ރޭ 9:00 ގައި ލައިވް ފެށިތާ މާ ގިނައިރުތަކެއް ނުވަނީސް ބޭންކަށް ދިމާވި މައްސަލަތަކާ އެކު ލައިވް ކުޑަކޮށް މަޑު ޖެހުނު ނަމަވެސް، އޭގެ ފަހުން އަލުން ލައިވް ފަށައި އެ ލައިވް ނިންމާލިއިރު ވަނީ 1.2 މިލިއަން ރުފިޔާ ހޯދައިފައެވެ.
މީ ދިވެހިން ޓިކްޓޮކް ލައިވެއްގައި މިހާ ގިނަ އަދަދަކަށް ފައިސާ އެއްކުރި ފުރަތަމަ ފަހަރެވެ. ފައިސާގެ ގޮތުގައި ދިން 1.2 މިލިއަން ރުފިޔާގެ އިތުރުން ގިނަ އަދަދެއްގެ އެހެނިހެން ހަދިޔާ ވެސް މީހުން ވަނީ ދޮންކަލޯ އަށް ފޮނުވާފައެވެ.
