ޑައުން ސިންޑްރޮމް ހުންނަ ކުއްޖަކަށް ވީތީ، ފަސް ސްކޫލަކުން ޖާގަ ނުދިނުމުން ކުއްޖާގެ މަންމަ އެ މައްސަަލަ ރައީސް ޑރ. މުހައްމަދު މުއިއްޒުއާ ހިއްސާކުރައްވައިފިއެވެ.
ކުއްޖާގެ މަންމަ ރައީސްއާ މިކަން ހިއްސާ ކުރީ، މިހަފްތާގެ ”ރައްޔިތުންގެ އަޑު“ ޕްރޮގްރާމްގައި ބައިވެރިވެގެންނެވެ.
ފާތިމަތު ފައިރޫޒާ އާދަމް ވަނީ ޑައުން ސިންޑްރޮމް ހުރުމުން ދަރިފުޅާމެދު ތަފާތު ކުރުންތައް ގެންގުޅޭތީ އެކަން ރައީސްގެ ސަމާލުކަމަށް ގެނެސް، ހައްލަކަށް އެދިފައެވެ.
ފައިރޫޒާގެ އަންހެން ދަރިފުޅު ކިޔަވަން ބޭނުންވި ސްކޫލުން ފުރުސަތު ނުލިބުނުއިރު، އިތުރު 04 ސްކޫލުން ވެސް އެ ކުއްޖާ އަށް ޖާގައެއް ނުދިނެވެ.
އޭގެ އިތުރުން ވެސް އެކި ތަފާތު ކުރުންތައް ކުރިމަތިވާކަން ވެސް އޭނާ ފާހަގަ ކުރިއެވެ.
ފައިރޫޒާގެ ވާހަކަ އަޑު އައްސަވައި ރައީސް ވިދާޅުވީ އެ ކަންކަން ބައްލަވާނެ ކަމަށެވެ.
ވީއެންމެ ރަނގަޅަކަށް ވީއެންމެ އަވަހަކަށް އެ ކަންކަމުގައި ވަކި ކުއްޖަކަށް ނޫން، މުޅި މުޖުމަޢުއަށް ފައިދާވާނެ ގޮތަކަށް ކަންކަން ފަހިވާން އަޅުގަނޑު ބޭނުމީ“ރައީސް ވިދާޅުވިއެވެ.
ޑައުންސިންޑްރޮމްއަކީ އިންސާނާގެ ޖީންއެއްގައި އިތުރަށް އެއް ކްރޮމޮސޯމް ހުރުމުގެ ސަބަބުން ދިމާވާ ސިއްހީ ހާލަތެކެވެ.
