ހުރިހާ ދަތިތަކަށް އޮތް އެންމެ ފުރިހަމަ ފަރުވާ އަކީ މާތްﷲ ހަނދުމަ ކުރުން ކަމަށް މިއަދުގެ ހުކުރު ހުތުބާގައި ބުނެފިއެވެ.
މިއަދު ރާއްޖޭގެ މިސްކިތްތަކުގައި އިއްވެވި ހުކުރު ހުތުބާގެ މައުޟޫއު އަކީ، ”ގިނަގިނައިން ﷲ ހަނދުމަކުރުން“ އެވެ.
ހުތުބާގައި ބުނީ، މާތް ﷲ ހަނދުމަކުރުމަކީ ހިތްތަކުގެ ދިރުން ކަމަށެވެ.
އަދި އެކަލާނގެ ހަޒުރަތާ ކުއްތަންވުމަށް އޮތް އެންމެ ފަސޭހަ މަގަކީ ޒިކުރުކުރުން ކަމަށާއި، އޭގެ ސަބަބުން ނަފުސަށް ހަމަޖެހުމާއި އުފާވެރިކަން ލިބި، ދިރިއުޅުމުގެ ހާސްކަމާއި ބުރަކަން ފިލައިގެންދާނެ ކަމަށް ވެސް ހުތުބާގައި ބުންޏެވެ.
އަދި ހެނދުނާއި ހަވީރުގެ ދުޢާތަކަށް ވަގުތު ހުސްކުރުމަށާއި، ނަމާދުގެ ފަހުގައި ކުރާ ޒިކުރުތަކަށް ފަރުވާތެރިވުމަށް ުހުތުބާގައި ވަނީ ގޮވާލައްވާފައެވެ.
އަދި ހަގީގީ ޒިކުރަކީ ހިތް ހާޒިރުކޮށް، ފާފަތަކާ ދުރުހެލިވުން ކަމުގައި ވެސް ހުތުބާގައި ފާހަގަކުރިއެވެ.
