އިދިކޮޅު ލީޑަރު، ރައީސް ޔާމީން އަބްދުލްގައްޔޫމަށް އިންސާފު ލިބެންދެން، މި އަހަރުގެ ރިޔާސީ އިންތިހާބު ފަސް ކުރުމަށް ޕީއެންސީގެ ރައީސް އަބްދުއްރަހީމް ގޮވާލައްވައިފިއެވެ.

އަބްދުއްރަހީމް ކުރެއްވި ޓްވީޓެއްގައި ވިދާޅުވީ، ރައީސް އިބްރާހީމް މުހައްމަދު ސޯލިހު ބާރާއި ނުފޫޒު ބޭނުންކޮށްގެން، އިދިކޮޅު ލީޑަރު، އަދި ދިވެހީންގެ ރިޔާސީ ކެންޑިޑޭޓް، ރައީސް ޔާމީން ޖަލުގައި ބާއްވައިގެން އިންސާފުވެރި އިންތިހާބެއް ނުބޭއްވޭނެ ކަމަށެވެ.

”ރައީސް ޔާމީނަށް އިންސާފު ލިބެންދެން ރިޔާސީ އިންތިހާބު ފަސް ކުރުމަށް ގޮވާލަން.“

އަބްދުއްރަހީމް މިފަދައިން ވިދާޅުވެފައިވާއިރު، ރިޔާސީ އިންތިހާބުގައި ވާދަކުރުމަށް ބޭނުންވާ ފަރާތްތަކުން ފޯމު ހުށަހެޅުމަށް ހުޅުވާލާނީ މިމަހުގެ 23 ވަނަ ދުވަހުން އަންނަ އޯގަސްޓުމަހުގެ 7 ވަނަ ދުވަހާއި ހަމައަށެވެ. ރައީސް ޔާމީން 11 އަހަރަށް ޖަލަށް ލުމަށް ކްރިމިނަލް ކޯޓުން އިއްވި ހުކުމްގެ އިސްތިއުނާފު މައްސަލަ އެ މުއްދަތުގެ ތެރޭގައި ނިންމޭނެ ކަމަށް ނުބެލެވޭއިރު، އިދިކޮޅު ފަރާތްތަކުން ދަނީ މިކަމުގެ ކަންބޮޑުވުންފާޅު ކުރައްވަމުންނެވެ.