ސަރުކާރާމެދު މާ ކުރިންސުރެ ނުރުހޭތީ، ބަޔަކު މި މުހިންމު ގައުމީ މަސައްކަތަށް ފާޑުކިޔައި، މަލާމާތްކޮށް  ބަދު ބަސްތަކެއް ރައްދު ކުރަމުން ދިޔަ ނަމަވެސް، މިއީ އާދައިގެ ކުޑަ ކަމެއް ނޫނެވެ.

ރާއްޖޭގެ 99.7 އިންސައްތަ އަކީ ކަނޑެވެ. ދިވެހީންގެ މި ނުވަލައްކަ އަކަ ކިލޯމީޓަރުގެ ބޮޑު ކަނޑުގެ ސަރަހައްދު ބަލަހައްޓާނެ އެއްވެސް ވަސީލަތެއް ކުރީގެ ސަރުކާރުތަކުން ހޯދާފައެއް ނުވެއެވެ. މާ ބޮޑު، ބުރަ ކަމަކަށް ވާނެއޭ ހިތައި، އެކަން ކުރަން ނޫޅެ، އޮތީ ދޫކޮށްލާފައެވެ.

އެ ވިސްނުން ދޫކޮށް، ދިވެހީންނަށް ވާނެކަމަށް ދެކި، ހުއްޓުމެއް ނެތި 24 ގަޑިއިރު ކަނޑު ބަލަހައްޓަން ފެށުމުން، ގެނައި އުޅަނދުގެ އަދަދު މަދޭ، ފައިޓަރ ޖެޓެއް ނެތޭ އެއާ ފޯސްއަކަށް ނުވެއޭ ކިޔާ ބަޔަކު ޖޯކު ޖަހަމުންދާތީ ހައިރާންވެއެވެ.

އެމްއެންޑީއެފް އެއާ ކޯއަށް ތައާރަފު ކުރި ޑްރޯން ނުވަތަ ޔޫއޭވީ ތަކަކީ މީޑިއަމް އެލްޓިޓިއުޑް ލޯންގް އެންޑިއުރެންސް، ޓެކްޓިކަލް އާރމަޑް ޔޫއޭވީތަކެކެވެ. މިއީ 220 ކިލޯމީޓަރުގެ ބާރުމިނުގައި މެދުނުކެނޑި 20 ގަޑިއިރަށް ދުއްވުމުގެ ގާބިލުކަން ލިބިފައިވާ އުޅަނދުތަކެއްވެސް މެއެވެ.

ރައީސް މުއިއްޒު ވެރިކަމާ ހަވާލުވެވަޑައިގަތުމަށް ފަހު ތުރުކީއަށް ކުރެއްވި ފުރަމާނަ ދަތުފުޅުގައި ކުރެވުނު މަޝްވަރާތަކާއި އެއްބަސްވުންތަކުގެ ދަށުން ގެނައި ތިން ޑްރޯން އޮޕަރޭޓު ކުރާނީ، ތުރުކީން ތަމްރީނުވެގެން އައި ދިވެހި ސިފައިންނެވެ. މިއީ ބޭރުގެ ސިފައިން ލައްވައި ކުރުވާ ކަމެއް ނޫނެވެ. އެއީވެސް އުފާ ކުރަންޖެހޭ ކަމެކެވެ. ޑްރޯން ދުއްވަން އައި ސިފައިން ނުގޮސްގެން އުޅެން ނުޖެހޭނެތާއެވެ.

ޑްރޯން އޮޕަރޭޝަނަށް މި އަހަރުގެ ޖެނުއަރީ މަހު ފެށި ތަމްރީނުު ނިންމައި ދިވެހި ސިފައިންގެ ފުރަތަމަ ބެޗު ރާއްޖެ އައިސްފައިވާއިރު، ވަރަށް އަވަހަށް ދެވަނަ ބެޗު ވެސް އަންނާނެއެވެ.