ވެރިރަށް މާލެއާއި އެއް ފެންވަރަކަށް ނުވަތަ، އެއަށްވުރެ ވެސް ރަނގަޅަށް އައްޑޫ ސިޓީ ތަރައްގީ ކުރަން ބޭނުންފުޅުވެލައްވާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މިރޭ އައްޑޫ ސިޓީގައި ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ. ރައީސްގެ ވާހަކަފުޅުގައި، އެމަނިކުފާނުގެ ރިޔާސީ މެނިފެސްޓޯ ހުށަހެޅިއިރު ވެސް، ދެމެހެއްޓެނިވި ތަރައްގީ ހާސިލު ވާނީ، މާލެ ގްރޭޓަރ މާލެ ސަރަހައްދެކޭ އެއްގޮތަށް ދެކުނާއި އުތުރުން ވެސް ހަތަރު އަތޮޅު އެކުއެކީގައި، އިންޓެގްރޭޓެޑް ޑޮވެލޮޕްމަންޓް ކޮންސެޕްޓުގައި ތަރައްގީ ކުރެވިގެންކަން ފާހަގަކުރައްވާފައިވާނެ ކަމަށް ވިދާޅުވެފައެވެ.
”އަޅުގަނޑު ބޭނުންވަނީ މާލޭގެ ތަރައްގީ، މާލޭގައި މި ކުރިއަށް ގެންދާ ހުރިހާ މަސައްކަތެއް، ގްރޭޓަރ މާލެ އޭރިއާއާ އެއް ފެންވަރަކަށް، ހުރިހާ ކަމެއް ވެސް، ސިއްހީ ނިޒާމުވެސް، ގެދޮރުވެރިކަން ވެސް، މާލެއާ އެއް ފެންވަރަކަށް އަދި އެއަށްވުރެވެސް ރަނގަޅަށް ތަރައްގީ ވެފައި އޮންނަ ތަނަކަށް މި ސިޓީ ހަދައިދިނުން.“ އެމަނިކުފާނު ވިދާޅުވިއެވެ.
ރައީީސްގެ ވާހަކަފުޅުގައި، މި ސަރުކާރުގެ ސަދަން ޑިވެލޮޕްމަންޓް ޒޯންގެ ތަރައްގީގެ މައި ހަބަކީ އައްޑޫ ސިޓީކަން ފާހަގަކުރައްވައި، މިއީ ވަރަށް ގިނަ ކަންކަން ކަމުގައި ވިދާޅުވިއެވެ. އެމަނިކުފާނު ވަނީ އައްޑޫގެ ރައްޔިތުންނަކީ ތަރައްގީގެ އުއްމީދުގައި އަބަދުވެސް ތިބެންޖެހޭ ބަޔަކަށްވާން އެމަނިކުފާނު އެދިވަޑައިނުގަންނަވާ ކަމަށް ވިދާޅުވެފައެވެ. އަދި ތަރައްގީގެ އުއްމީދުގައި، ހަގީގީ ކުލަ ޖެހި، ނަތީޖާ ދައްކައިދޭން ބޭނުންވާ ކަމަށް ވެސް އެމަނިކުފާނު ވިދާޅުވިއެވެ.
