ފ.އަތޮޅު ހޮސްޕިޓަލުގެ އާ އިމާރާތުގެ އަމަލީ މަސައްކަތް މި އަހަރު ތެރޭގައި ފަށާނެ ކަމަށް ހެލްތު މިނިސްޓަރު ޑރ.ހަލީލު ވިދާޅުވެއްޖެއެވެ.
މިނިސްޓަރު ހަލީލު މިގޮތަށް ވިދާޅުވެފައި ވަނީ ރައީސް ޑރ.މުހައްމަދު މުއިއްޒު ފ. އަތޮޅަށް ކުރައްވަމުން ގެންދަވާ ދަތުރުފުޅުގައި ނިލަންދޫގެ ރައްޔިތުންނާ ބައްދަލުކުރެއްވުމަށް ރޭ ބޭއްވި ޖަލްސާގައެވެ.
އޭނާ ވިދާޅުވީ ސިއްހީ ދާއިރާ ތަރައްގީ ކުރުމަށް ނިލަންދޫގައި ހުންނަ ފ. އަތޮޅު ހޮސްޕިޓަލުގެ އާ އިމާރާތް އެޅުމަށް އެމްއޯޔޫއެއްގައި ސޮއިކޮށް، މިހާރު ކުރަމުންދަނީ ޑިޒައިނިންގ އާއި އެތަނުގައި ގާއިމުކުރަން ޖެހޭ ހިދުމަތްތައް ދެނެގަތުމުގެ މަސައްކަތްތައް ކަމަށެވެ. އަދި އެ މަސައްކަތްތައް ނިންމައި ފައިނަލް ކޮންޓްރެކްޓުގައި ސޮއި ކުރަން މާގިނަ ދުވަހެއް ނުނަގާނެ ކަމަށް ހަލީލު ވިދާޅުވިއެވެ.
ނިލަންދޫ ހޮސްޕިޓަލުގެ މަސައްކަތް މިއަހަރު ތެރޭގައި ފަށަން ނިންމާފައިވާއިރު، ތޮޅު ވެރިކަން ކުރާ ހުރިހާ ރަށެއްގައި ޑަޔަލިސިސް ހިދުމަތް ފެށުމަށް އަދުގެ ސަރުކާރުން ނިންމަވާފައިވާ ނިންމެވުމާއެއްގޮތަށް އަވަސް މުސްތަގުބަލެއްގައި ނިލަންދޫގައި ވެސް އެ ހިދުމަތް ފެށިގެންދާނެކަމަށް ހަލީލު ވިދާޅުވިއެވެ.
އަދި ހޮސްޕިޓަލުގެ އާ އިމާރާތާއެކު ހިދުމަތްދޭ އެނދުގެ އަދަދު އިތުރު ކުރެވިގެންދާނެކަން ފާހަގަކުރައްވައި، ކާރިސާއެއް ނުވަތަ ބަލިމަޑުކަމެއް ދިމާވާ ހާލަތެއްގައި ހޮސްޕިޓަލުގައި ހުރި އެނދުގެ އަދަދު ނުފުދިފައި އޮންނައިރު، މިކަން ހައްލު ވެގެންދާނެ ކަމުގައި ވެސް ވިދާޅުވިއެވެ.
މިނިސްޓަރު ވިދާޅުވި ގޮތުގައި، މިކަމުން ހާމަވަނީ ރައްޔިތުންގެ ސިއްހަތު ކުރިއަރުވަން ރައީީސް ޑރ.މުހައްމަދު މުއިއްޒުގެ ހިތްޕުޅުގައި ހުންނެވި އޯގާތެރިކަން ކަމަށެވެ.
