ރައްޔިތުންގެ މަޖިލީހުގެ އިންތިހާބަށް ނުފޫޒު ފޯރުވުމަށް ހއ.ހޯރަފުށި ކައުންސިލުން ކުރަމުން ގެންދާ ކަންކަން ޕީޕީއެމް/ޕީއެންސީ އިން ކުށްވެރި ކޮށްފިއެވެ.
އެ ކޯލިޝަނުން މިއަދު ނެރުނު ބަޔާނެއްގައި ބުނީ، މި މަހުގެ 21 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި ޕީއެންސީގެ ފަރާތުން ވާދަ ކުރައްވާ ކެންޑިޑޭޓަށް އެންޓި ކެމްޕެއިން ކުރުމުގެ އިތުރުން، ހޯރަފުށީގައި ހުރި ކައުންސިލުގެ ހުރިހާ ވަސީލަތްތައް ބޭނުން ކުރަމުންދާ ކަމަށެވެ.
”އެގޮތުން ކައުންސިލުގެ މުވައްޒަފުން ކެމްޕެއިންގައި ބޭނުން ކުރުމާއި، ތަނުގައި ހުރި ވެހިކަލްތަކާއި ޕްރިންޓަރާއި ކަރުދާހާއި، އެހެނިހެން ވަސީލަތްތައް ވެސް ބޭނުން ކުރަމުން އެބަދެއެވެ.“ ބަޔާނުގައިވެއެވެ.
އެ ބަޔާނުގައި ވަނީ، މިވަގުތު ހޯރަފުށީ ކައުންސިލުގެ އަމާޒު ހުރީ ގާނޫނުން ކައުންސިލާ މަތިކޮށްފައިވާ ޒިންމާތައް އަދާ ކުރުމަށް ވުރެ ބޮޑަށް، ރަސްމީ އަދި ނުރަސްމީ ގަޑީގައި ވެސް އިދިކޮޅު ކެންޑިޑޭޓަށް ކެމްޕެއިން ކޮށްދިނުމަށް ކަމަށް ބުނެފައެވެ.
އަދި އިންތިހާބާ ދިމާކޮށް ކައުންސިލުން ގޯތި ދިނުމާއި، މިހާރު ބިން ލިބިފައިވާ މީހުންގެ ބިންތައް ބޮޑު ކޮށްދޭނެ ކަމަށް ވެސް ބުނަމުންދާ ކަމަށް ޕީޕީއެމް/ޕީއެންސީގެ ބަޔާނުގައިވެއެވެ.
މިއީ ގާނޫނާއި ވެސް ހިލާފު ކަމެއްކަން ފާހަގަކޮށް، ގާނޫނީ ހުދޫދުގެ ތެރެއިން ކެމްޕެއިން ކުރުމަށް ޕީޕީއެމް/ޕީއެންސީން ވަނީ ހޯރަފުށި ކައުންސިލްގެ މެމްބަރުންނަށް ގޮވާލާފައެވެ.
އެ ބަޔާނުގައި ވަނީ، ހޯރަފުށީ ކައުންސިލުން ދައުލަތުގެ ވަސީލަތްތައް ނަހަމަ ގޮތުގައި ބޭޭނުން ކުރަމުންދާ މައްސަލަ، ކަމާބެހޭ މުއައްސަސާތަކުން ބަލައިދިނުމަށް ވެސް ގޮވާލާފައެވެ.
