އެމަނިކުފާނުގެ ވެރިކަމުގެ ދުވަސްވަރު، އެއްވެސް ވަރަކަށް ވަޒީފާގެ ބިރު ނުދައްކާ ކަމަށް ވިދާޅުވެ ކުރީގެ ރައީސް އިބްރާހީމް މުހައްމަދު ސޯލިހު މިއަދު އިތުރުފުޅު ހައްދަވައިފިއެވެ.
ސޯލިހު ވެސް ގެންދަވަނީ، މި މަހުގެ 21 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބަށް ކެމްޕެއިން ކުރައްވަމުންނެވެ. އެގޮތުން މިއަދު ބޭއްވި ކިނބިދޫ ދާއިރާގެ ކެމްޕެއިން ޖަލްސާގައި ސޯލިހު ވަނީ ވެރިކަން ކުރާ ޕީޕީއެމް/ޕީއެންސީ އިން ކުންފުނިތަކުގެ މުވައްޒަފުންނަށް ވަޒީފާގެ ބިރު ދައްކަމުންދާ ކަމަށް ތުހުމަތު ކުރައްވާފައެވެ. އަދި އެމަނިކުފާނުގެ ވެރިކަމުގައި، ސިޔާސީ ގޮތުން ފިކުރު ތަފާތު ވުމުން، ވަޒީފާގެ ބިރު ދައްކާފައި ނުވާނެ ކަމަށް ވިދާޅުވިއެވެ.
”އެ މީހަކު ބޭނުން ސިޔާސީ ވިސްނުމެއްގައި، މަސައްކަތް ކުރުމުގެ ޖާގަ އަޅުގަނޑުމެން ދިނިން. އެހެންނަމަވެސް، އެ ބިރުވެރިކަން މިއަދު އަނެއްކާ ވެސް އެނބުރި އަންނަތަން މި ފެންނަނީ.“ ސޯލިހު ވިދާޅުވިއެވެ.
ސޯލިހު މިހެން ވިދާޅުވީއިރު، އެމްޑީޕީގެ ނިމިގެންދިޔަ ސަރުކާރުން ވަޒީފާގެ ބިރު ދައްކައި، އިންތިހާބުތަކާ ދިމާކޮށް، ވަޒީފާތައް އުފެއްދުން ފަދަ ކަންކަން ކުރަމުންދިޔަކަން އެންމެ ބޮޑަށް ފާހަގަ ކުރަމުން ދިޔައީ އެމްޑީޕީން ވަކިވެ، އާ ސިޔާސީ ޕާޓީއެއްގެ ގޮތުގައި ”ޑިމޮކްރެޓްސް“ އުފެއްދި ފަރާތްތަކުންނެވެ.
އިންތިހާބުތަކާ ދިމާކޮށް ކުންފުނިތަކުގެ ވެރިން ރަށްތަކަށް ގޮސް ވަޒީފާތައް ބެހުމާއި ވަޒީފާތަކުގެ ކުރިއެރުން ހައްގު ނޫން މީހުންނަށް، ޕްރޮމޯޝަން ދިނުމާއި އިންތިހާބުގައި ވަކި ވިސްނުމެއް ހުރުމުގެ ސަބަބުން އެ މީހުން އެހެން ރަށްތަކަށް ބަދަލު ކުރުން ނުވަތަ އިތުރު ގޮތަކަށް ބިރު ދައްކައި ނުފޫޒު ފޯރުވުމަށް މަސައްކަތް ކުރިކަމުގެ ތުހުމަތު އެމްޑީޕީގެ ސަރުކާރަށް ކުރިއެވެ.
